Shillong, Naitung 05: U President ka HSPDP Bah PK Pangniang hynne ka sngi ba-ar ula kyntu ia ki arngut ki MLA kata ia u Bah Renikton Lyngdoh Tongkhar bad Bah Samlin Malngiang, ba kin buh noh ia ka shithi iehnohkam na ka party lada ki kwah ban leit pyniasoh sha kiwei pat ki party shuwa ka elekshon MLA 2023.
“Lada ki (MLA) la rai ban leit pyniasoh bad kiwei pat ki party, nga ai jingmut ia ki ba kin buh noh ia ka shithi iehnohkam na ka Party” ong u Bah Pangniang haba iakren bad ki nongthoh khubor hadien ka jingialang jong ka Central Executive Committee (CEC).
U Bah Pangniang ula jubab ia kane halor ka jingkylli ba mih ki jingkynnoh ba u Bah Renikton uba dei ruh u Myntri Sorkar, u don ka jingthmu ban leit pyniasoh noh sha ka UDP bad u Bah Samlin sha ka NPP hashuwa ka elekshon ban long ha u snem ban wan ha Jylla.
Hynrei u Bah Pangniang ula ong ba ka HSPDP kala iakren ia kine ki arngut ki MLA bad kyrpad ia ki ba kin pyrkhat biang ia kane ka rai. “Ngin pyrshang ban pynkohnguh ia ki ba kin iai neh shuwa bad ka party” ula bynrap.
Haba kylli, une u Nongialam ka HSPDP ula ong ba ka jingrung jingmih jong ki Nongialam ka dei kaba jia beit ha manla ki party haba ong “Hynrei ban ong ba da ka jingmih ki MLA, ka party kan nym lah khiekhlieh shuh ka dei kaba bakla shibun. Kum ka Party ngi la mad ia kum kine ki jingjia bad ngi dei ka party kaba la don la 54 snem, ngi la kut jingmut ban trei shitom ha kaban pynthikna ba ngin ioh bun ki MLA ha ka elekshon MLA 2023”.
Haba pynpaw ba baroh arngut ki MLA ki dang don bad ka HSPDP, u Bah Pangniang ula pyntip ba ka party kala lum ia ki jingtip na ka Mawkyrwat Unit jong ka Party halor ka jingkynnoh ba ki dkhot ki la leit rung sha ka UDP.
Halor ka jingpep u Bah Ranik bad u Bah Samlin na ka jingialang jong ka CEM, u Bah Pangniang ula ong ba kine ki arngut ki MLA kila dep pyntip ba kin ym lah ban wan namar ki daw ki bym lah ban kiar.
Ha kajuh ka por, ka HSPDP kala bthah ia baroh ki District Committee ba kin ithuh noh ia ki kyrtong ki ban aireng ha ka elekshon 2023.
