Shillong, Nailar 14: U President ka BJP-Meghalaya Bah Ernest Mawrie ula pyntip ba ula dep ban phah ia ka kaiphod sha ki Nongialam ha Delhi halor ka jingjia ba dang shen kaba lam sah ka jingshah kem u Vice President bad MDC ka Tura Bernard N Marak, uba shah kynnoh pyniaid kam khaii met ha ka farmhouse shimet jong u, kaba don ha Edenbari, West Garo Hills.
“Ha ka por ba jia kane ka jingjia, ki Nongialam na Delhi kila bthah ia nga ban pynlong ia ka jingtohkit. Nga la dep ban phah mynta ia ka kaiphod sha phi bad mynta ngi dang ap ia ka jingaiktien na ki” iathuh u Bah Ernest.
Ha ka 22 tarik Naitung, ki Pulit ka West Garo Hills kila kyndang ia ka ktem khaii met ha Rimpu Bagan ba long trei da une u MDC, kaba lam sha ka jingkem ia 73 ngut ki briew bad ioh pyllait ia 5 ngut ki Khynnah nalor ka jingioh kurup ia ka kyaid bad ki condom.
Ka BJP kala dawa ruh ban thung da ka kynhun tohkit ba laitluid halor kane ka jingjia.
Haba ban biang ba ka jingkhynra ka dei tang ka jingkput kam sain pyrthei, u Bah Ernest ula ong “Wat u National Vice President ba peit ia ngi u M Chuba Ao, ula dep kren baka dei tang ka jingkynnoh namar naka liang ka jong u, ula dep pynlong ia ka jingtohkit na ki tyllong lajong, ki riew paidbah kiba sah ha Tura bad ha Ri-lum Garo”.
Une u Nognialam ka BJP u pyntip ba ki bahaiing hasem jong u Bernard kila pynkhreh mynta ban iakhun pynioh jamin noh ia u.
Haba kylli, une u Nongialam ka BJP ula ong ba kan shong ha ka rai jong ki Nongialam na Delhi la ka BJP kan dang iai kyrshan ne weng noh ialade na ka sorkar MDA.
“Ngim pat ban kren eiei la ngin weng noh ne em na ka Sorkar namar kane ka dei ka jingbthah kaba wan na ki Nongialam na Delhi. Kin sa shong bishar ia ka kam bad kin sa shim rai ha ka por kaba dei” ula ong.
