Shillong, Nailar 14: Ka Bharatiya Janata Party (BJP)-Meghalaya, kala dawa ia ka Sorkar Meghalaya Democratic Alliance (MDA) ban sei paidbah noh ia baroh ki kaiphod jingtohkit jong ki Inquiry Committee bapher bapher, kiba tohkit ia ki jingkynnoh bamsap.
“Ka dei ka jingsngew jong nga ba kano kano ka jingtohkit bala dep ba sngewbha ban sei madan ia ki jingshisha ha ka rynsan paidbah khnang ba ki paidbah kin tip la ka dei kaba iadei bad ka GHADC, JHADC lane kiwei kiwei ki jyrsieh” ong u Bah Ernest Mawrie, President ka BJP.
Ka BJP kala kynnoh ia ka jingbamsap na ki song pisa ka sorkar Pdeng ha ki artylli ki Autonomous District ka Jylla- ka GHADC bad JHADC.
U Bah Ernest ula ong ba wat ia ka kam jong u Nongialam barim ka HNLC Bah Cheristerfield Thangkhew, ka party ka sngew ba ka dei ka kamram jong ka Sorkar ban sei paidbah noh ia ka kaiphod haba ka jingtohkit ka dei kaba la dep.
Ula ong ruh ba ka ain ka treikam kumjuh ia baroh bad kito kiba donkti ki dei ban shah pynsajia.
