Shillong, Lber 20: Ka Bharatiya Janata Party (BJP) na Nongbah New Delhi kala phah 2 ngut ki nongialam ba rangbah sha Meghalaya, ban khmih iaka jingpynkhreh ka Party ia ka elekshon MP 2024 ka ban long haka 19 tarik Iaiong.
Haba pyntip ia kane u President ka Meghalaya BJP Rikman G.Momin ula iathuh ba ki 2 ngut ki Coordinator bala phah na Delhi shapoh ka Jylla ki kynthup u Nongaiktien ka Assam BJP u Kishor Upadhya u ban khmih hapoh ka Shillong Parliamentary Seat bad u Akshay Rajkhowa un khmih iaka Tura Parliamentary Seat.
“Hoid kine 2 ngut ki Coordinator bala phah na Delhi kila wan ban iarap bad ban pyni ia nga iaki lynti haba iadei bad ki sienjam baka Party kan shim halor ka elekshon MP ka ban long haka 19 tarik Iaiong 2024” ong u Rikman.
Haba iadei bad ka jingslem ka BJP Meghalaya ban pynbna kyrtong, u Rikam ula ong “Ia kane phi lah ban kylli naki nongialam ka BJP na Delhi. Ka Meghalaya BJP kala dep phah iaka thup kyrteng sha Delhi bad haduh mynta ngi dang ap iaka rain a Delhi”.
U Rikman ula ong baka Party kala long kaba la pynkhreh ban iakhun haka ilekshon bad mynta ka shong sa iaka jingioh jingmynjur iaki kyrtong hashuwa ban phai khmat sha u paidbah naka bynta ka jingkyrshan.
“Ia ki kyrtong lah ban pynbna shi sngi shwa ka jingthep kyrteng hynrei kam pher namar ka Party ka long kaba la pynkhreh ban iakhun” ula ong.
