Nongstoiñ, Lber 20: Ka “Art and School of Music”, ha ka taïew ba la dep ka la plie ia ka Shlem ai jinghikai ba don ha Mawïong Pyndengrei, bad pdiang shim klas ïa ki khynnah kiba kwah ban pyntbit ha ka put ka tem.
Ïa katei ka shlem la plie paidbah da u Dr. Dameshwa Lyngdoh kum u kongsan ha ryngkat ka jingïadonlang u Pastor S.L Lyngkhoi u ba dei uwei na ki nonghikai tem ba nyngkong eh ha ka thaiñ Nongstoiñ.
Kum shi bynta ban pynshit pynshngaiñ shuh shuh ïa katei ka sngi, la ïoh ïa ki jingrwai kyrpang bad jingtem kyrpang na ki samla, kynthup na ka Kid’s Tarari, ka Khmih bad kiwei kiwei.
U kongsan u ba dei u Doktor u la pynktik mynsiem ruh ïa ki paidbah, namar ka jingpyni sap tem lang jong u lyngba ka jingtem kaitar (guitar) ha ki sur kiba sngew thiang.
Ha katei ka jaka ka don ruh ka music studio recording, kaba la pynïaid da uwei na ki samla jong katei ka shnong Mawïong Pyndengrei.
U kongsan haba ai jingkren u la ong, “Lada ngim lah ban pynsngew tynnad shuwa ïalade yn ym lah ban pynsngew tynnad ïa kiwei lyngba ki jingput jingtem, kumta kat kaba phi leh dei ban leh naduh ka mynsiem” ong utei u Doktor.
