Shillong, Nailur 30 : Ka Iingkashari Meghalaya High Court ha ka sngi palei ka la bthah ia ka Khasi Hills Autonomous District Council (KHADC) bad ka Meghalaya State Pollution Control Board (MSPCB) ban jurip ia ki sawdong sawkun jong ka pung Umiam.
“Ka Khasi Hills Autonomous District Council bad ka State Pollution Control Board ki dei ban jurip ia ka sawdong sawkun jong ka pung Umiam bad kum ka jingsdang, ki dei ban pynthikna ba kino kino ki kam jong ki riew shimet kim dei ban pynjakhlia ia ka um ha kano kano ka rukom ruh” ong ka Iingkashari ki arngut ki Nongbishar ha ka hukum ba pynmih halor ka PIL ia kane ka kam.
Ka hukum ka ong ba ki nongmudui kila kam ba ki don bun ki jingtrei jong ki riew shimet kiba pyntrei ha ka thain kaba la pynjaboh ia ka wah Umiam kynthup ka Resort ha ka kyrteng Orchid ba lah pyniaid da ka Meghalaya Tourism Development Corporation.
Ki nongshah mudui ba kynthup ia u bah Philosopher Iawphniaw bad Banalari Khongwar, kila ioh ia ka notice halor ka jingshna beain ia ki jingtei harud ka pung Umiam.
“La pyntip ha ka jaka jong ki nongshah mudui ba ka jingtei ba la pyntrei haba iadei bad ka Ever Banalari bad Moon View Cafe ki dei kiba la ioh jingbit ,” ong ka hukum.
“Namar kane, la bthah ia kine ba kin file affidavit ba pyndait lang ia ki kot ki sla ba ioh jingbit bad ba bud kat kum ki rules. Dei ban file ia ka affidavit hapoh ka 12 tarik u Risaw” ong ka hukum.
La pyntip ruh ba ia ka Ever Babalari lah dep ban khang khyrdep bad ym shym la pyndonkam shuh hynrei ka jingtei jong ka Moon View Cafe ka dei ka bym pat pyndep satia bad ka bym pat pyndonkam.
“Namar kine kiei kiei, ym pynmih hukum satia halor ka jingpyndonkam ia kine ki jingtei”, ong ka hukum haba buh ban bishar biang ia ka kam ha ka 17 tarik u Risaw.
