Agartala, Nailur 30 :Haduh kumba 3000 ngut ki kynthei ha Tripura kila jah rngai noh tang ha kine ki phra bnai kiba la dep mynta ka snem.
Ia kane la pyntip da u Myntri Rangbah (CM) ka jylla Tripura, u Dr Manik Saha.
Haduh 2968 ngut ki kynthei kaba kynthup ia 263 ngut kiba dang hapoh ka rta kila jah rngai noh tang hapdeng u bnai Kyllalyngkot haduh u bnai Nailar ba la dep.
Hynrei, watla katta napdeng ki 2968 ngut ki kynthei kiba la jah rngai, na ka liang ki bor pulit ka Tripura kila lah ban pyllait im ia kumba 2524 ngut.Napdeng kine kiba la ioh pyllait im ki kynthup ia 242 ngut ki khynnah kiba dang hapoh rta.
Nalor kata u CM ka Tripura ula ong ruh ba ka jingpynlong ia ka jingtohkit ka dang iaid shakhmat ban lapdien ia kiwei pat ki kynthei kiba dang jah rngai.
Ha baroh kila don haduh 254 ngut ki briew kiba la shah kem ha kaba iadei bad kine ki jingjia, ong shuh shuh u CM ka Tripura.
Kiba bun na kine ki kynthei kiba jah rngai katkum ki pulit la ong ba ki dei kiba la phet ha ryngkat ki samla jong ki.
Lah ban kdew ba ki bor pulit ka Tripura dang shen kila ngan ha ka jingeh kaba khraw ha kaba iadei bad ki kam bom shnong ha ki bynta bapher bapher ka jylla, kata ki jingjia kiba la mih namar ka jingkynnoh nongkhaii briew.
