Shillong Lber 23: U President ka NPP Meghalaya u Bah Prestone Tynsong ula ong, ba ka NPP ka pdiang sngewbha ia ka jingshim rai ka BJP ban ai jingkyrshan ia ka NPP ha ka elekshon MP Lok Sabha ha ka jylla Meghalaya.
“Ka seng NPP ka pdiang sngewbha ia ka jingrai ki nongialam kiba hakhlieh jong ka BJP na Delhi ban ai jingkyrshan ia ki arngut ki kyrtong ka NPP na Tura bad Shillong kiba iakhun ia ka elekshon MP. Ngam poi pyrkhat, hynrei ngi sngewtynnad shibun bad ngi ioh mynsiem bad ngi sngew donbok ia kane ka rai kaba ki heh duh ka BJP kila shim ba ki kyrshan ia ki kyrtong jong ngi” ong u Bah Prestone Tynsong.
Ula ong, ka jingwan ai jingkyrshan ka BJP ia ka NPP kan long ka jingmyntoi namar ka Vote jong ka BJP kan wan noh sha ki kyrtong jong ka NPP.
“Ha ka jingpeit hi ka jong ngi, kan long ka jingmyntoi namar ka Vote ka BJP ha Shillong Constituency la kumno kumno ruh ka ju ioh 70,000 ne poi haduh shi lak, te mynta kane ka vote ha ka jaka ba kan leit sha kiwei ne ba kan neh beit ha ka BJP kan leit noh sha ki kyrtong ka NPP bad kane kan dang iarap shuh shuh” ong u Bah Prestone.
Ula iathuh, ba shen ki nongialam ka NPP bad ka BJP kin sa iakynduh bad kin shong jingialang na ka bynta ban pyniaid shakhmat ia ki kam kiba iadei bad ka elekshon MP ha Shillong bad Tura Constituency.
