Baghmara, Lber 23: Ki Hati Khlaw kila shim ia ka jingim jong uwei u nong Bangladesh ha ka thaiñ khappud kaba don ha South Garo Hills haba katei ka kynhun ki Hati kala leit rung ha kawei ka shnong kaba don ha khappud.
Ha ka miet jong ka sngi Thohdieng, ka kynhun ki Hati Khlaw kila leit wad bam, ha ka thaiñ Sibbari jong ka South Garo Hills bad la ngeit skhem ba kadei katei hi ka kynhun ki hati kaba la leit shapoh ri Bangladesh ha kaba kala don katei ka jingjia ha ka por shiteng miet.
Ha katei kajuh hi ka miet, sa kawei ka kynhun ki hati kala wan rung ha ka thaiñ Jongkol Kongkona kaba don shabar jong ka sor Baghmara bad kine ki hati kila pynjulor ia kawei ka dukan saiñ nar bad ia kawei ka iïng kaba thylli.
Ka kynhun ki hati kiba wad bam kila rung ha kylleng ki bynta jong ka rilum Garo bad kane kala buh ha ka jingtieng jingsyier ia ki paidbah.
Na ka jingtur ki briew ban shna ia ki iing ki sem ha ki jaka khlaw kiba dei ruh ki lynti iaid jong ki hati, kala pynmih ia ka jingiatyngkhuh bad jingiakhun hapdeng ki briew bad kitei ki mrad khlaw katba nang iaid ki snem.
Mynta la jan man la ka por, la sakhi ba ki hati kila wan ban iaid ha ka sor Tura ruh ia kaba ym ju kham iohi koit ha ki snem kiba mynshwa.
