Shillong, Risaw 17 : Ka Meghalaya BJP kala pdiang sngewbha ia ka sienjam bala shim da u Myntri Rangbah Conrad K Sangma ban pynlong ia ka jingialang bad ki Kynhun bapher bapher ha kaban leh eiei halor ka jingkiew ki kam bymman ha East Khasi Hills khamtam eh ha Shillong.
“Kane ka jingialang ka dei ka sienjam ba kongsan ha kaban wanrah ia ka jingshaniah ki paidbah bad ban pynthikna ia ka jingshngain bad jingiada ia ki nongshongshnong jong ngi. Ka jingshimkhia u Myntri Rangbah, ka jingkloi ban leh eiei halor ki jingsngewkhia ki riewpaidbah bad ka jinglah ban wanrah ia ki lad ki lynti ka pyni ia ka jingshimkhia jong ka Sorkar, ka kam kaba dei ban ioh burom na baroh” ong u General Secretary ka BJP Bah W Pohshna ha ka kyrwoh.
Ka BJP kala kyntu ruh ia ka Sorkar ban buddien da ki sienjam kiba khlain, kynthup ban pynkhlain ia ki bor pynjari ain bad ka jingpeit ia ka suk ka sain ha ki shnong ki thaw, pynkhlain ia ka lad peitngor bad ki lad jingiarap ba kyrkieh, ban pynthikna ia ka jingtreikam kaba shai bad kaba don jingkitkhlieh ha ki bor district, ban buh hakhmat eh ia ka jingshngain jong ki khynnah, bad ban buh ia ki lad ki lynti ban pynbeit ia ki jingeh jong ki paidbah.
