Guwahati, Risaw 17: Ki pulit ka Singapore ki la kyntu ia ki paidbah ba ki dei ban kiar na kaba pynsaphriang khubor thok ha kaba ia dei bad ka jingkhlad jong u nongrwai Zubeen Garg.
Ki Pulit ka Ri Singapore kila buh ia kane ka jingkyntu namar ba ki khubor hamsaia haki rynsan Social Media (Online) ki dang iai bteng ban saphriang halor ka jingkhlad u Zubeen.
Ha ka jingpynbna, ka SPF ka la pynthikna ba ki jingtohkit ba nyngkong kam shym la pyni ba kano kano ka jingleh bymman ha ka jingiap jong u Zubeen.
Ia kane ka mukotduma la tohkit katkum ka ain Coroners Act 2010, bad ia ki kaiphod yn sa ai sha State Coroner bad kane ka jingtohkit kan shimpor ym duna lai bnai.
“Ka SPF ka tip ïa ki jingkynnoh bad ki jingpyntip lamler kiba la saphriang lyngba ka internet ha kaba ïadei bad ki jinglong jingman jong ka jingiap jong u Zubeen Garg” la ong ka kyrwoh. “Ngi kyntu ïa ki paidbah ba kim dei ban shu mutdur bad pynphriang ïa ki jingtip ki bym pat lah ban pynshisha.”
Ki pulit ki la pynshai ba hadien ba la dep ka jingtohkit, u State Coroner un sa rai la un pynlong ne em ïa ka Coroner’s Inquiry (CI), ka jingtohkit kaba thikna, kaba wad ïa ki jingshisha ba la ïalam da u ophisar jong ka ïingbishar ban tip ïa ka daw bad ki jinglong jingman jong ka jingïap bad ia ki jinglap jong ka jingtohkit yn sa pynpaw paidbah.
Wat hapdeng ka jingtohkit kaba dang ïaid shakhmat, ka SPF ka la kdew ba ka la sam ïa ka kopi jong ka kaiphod jong ka Autopsy bad ki jinglap ba nyngkong jong ka jingtohkit bad ka High Commission of India ha Singapore ha ka 1 tarik Risaw 2025, hadien ka jingkyrpad jong ki.
“Ka SPF ka don iaka thong ban pynlong ia ka jingtohkit kaba bniah halor kane ka kam, bad kane ka shim por. Ngi pan ia ka jingiaishah bad ka jingsngewthuh na baroh”.
