Shillong Rymphang 01: Ki Champion jong ka Khelo India Youth Games 2023 kila ioh ia ka jingpdiang burom kaba da shong kun bha hynne ka sngi Palei na ka Sorkar Jylla, kaba la pynlong da ka Open Truck Road Show naduh Mawlai ter ter haduh ha madan Polo.
Kine ki Champion ki dei jong ka kynhun ialehkai phutbol U-18 kiba la ioh rah ia ka nam lahduh ha ka lympung ialehkai Khelo India Youth Games 2023, kaba long ha Tamil Nadu. Kane ka kynhun kal aioh rah ia ka nam lahduh da ka jingjop ba 2-0 kol pyrshah ia ka Punjab.
Kane ka kynhun ialehkai kaba la wan phai sha Jylla hynne ka sngi Palei, kala shah pdiang sngewbha naduh ba ki wan poi ha Guwahati bad la pdiang sngewbha ia ki da u District Sports Officer ka Ri-Bhoi District.
Ynda la poi ha Shillong, la pdiang sngewbha pat ia ki da ka Tnad Sports & Youth Affairs, ka Meghalaya Football Association bad ka Meghalaya State Olympic Association.
Hadien kane, katei ka kynhun ialehkai kala leit sa sha Secretairiat ha kaba u Myntri Rangbah ka jylla Conrad K Sangma ula ai khublei kyrpang ia kine ki samla ka jylla kiba la wanrah ia ka nam bad burom ia ka jylla lyngba ka kam ialehkai bad ula kyntu iaki ba kin bteng ban ialehkai bha shuh shuh nangne shakhmat.
U Myntri Rangbah ula pyntip ba ka sorkar jylla kala phaikhmat bha sha ki kam ki ban kyntiew iaka kam ialehkai ha ka jylla baroh kawei.
U Myntri Rangbah ula pynbna ruh ba ka Sorkar Jylla kan sa ai khusnam da ka song pisa sha kine ki rang ialehkai. U ong ba ia kane ka jingai khusnam song pisa yn sa sam ha ka 5 tarik kaba dei ka sngi ban ai khusnam song pisa ia kiba ioh takma ha ka 5th Meghalaya Games 2024.
Hadien kane, na ka liang ka tnad Sports & Youth Affairs kala pynkup burom ia kine ki nongialehkai phutbol da kaba ai ia ki jingai sngewbha sha man la uwei pa uwei u nongialehkai ryngkat bad ia ki Coach bad Manager.
Ha kane ka jingialang, u Myntri ka Tnad Ialehkai u Bah Shakliar Warjri ula pynbna ruh ba ka sorkar jylla kan sa ai da ka Scholarship ia kine ki khynnah ialehkai kiba la wanrah ia ka nam bad burom ia ka Jylla.
Ula ong, ba ka jingjop ka jong ki kam dei eh tang ba ki wanrah nam bad burom iaka jylla hynrei kadei ruh ka jingwanrah burom ialade bad ual kitbok ia kine ki nongialehkai ba kin nang bteng ban trei met bad mynsiem ban kiew shaphrnag haka jingialehkai football bad ban nang wanrah nam shuh shuh ia ka jylla.
