Nongpoh, Rymphang 22: Ka Hynniewtrep National Youth Front (HNYF) Northern Region, mynta ka sngi, ka la pdiang burom ia ka Kong Magret Pathaw kaba la lah ban wanrah ia ka nam ka burom lyngba ka jingjop jong ka ia ka takma rupa na ka lympung iakhun kti kaba la tip kum ka Mr. Universes Persian Gulf Arm Wrestling Championship kaba la pynlong ha Ramsar Iran kaba la sdang naduh ka 15 haduh 20 tarik Rymphang 2023.
Ha kane ka jingpdiang burom la donlang da u Bah Marcus Marten, President lem bad kiwei kiwei, ha kaba la sakhilang ruh da u kurim ka Kong Pathaw u Bah Rocky Kylla, u ba dei u Chairman ka Umsning Town Dorbar, ki bahaiing hasem bad kiwei kiwei.
Lah ban kdew hangne, ka Margret Pathaw kala wanrah teng ia ka nam ka burom ia ka jylla Meghalaya bad ka Ri India na ka rynsan iakop iakhun kti Arm Wrestling na Turkey.
Haba kren ha kane ka sngi, ka Kong Margret Pathaw ka la pynpaw ka jingsngewnguh ia ki sengbhalang bapher bapher kiba don ha Ri Bhoi ,kiba la ai mynsiem ia ka naduh ka por shwa ban kan mih na ka Jylla haduh da waiphai, khamtam eh ia u nonghikai u Bah Alan Sun Marbaniang lem bad kiwei kiwei.
Na ka liang u Bah Marcus Marten u la pynpaw ia ka jingsngewsarong kaba khraw halor kane ka jinglah jong ka Kong Margret Pathaw ban nang kiew bad ban wanrah ia ka nam ka burom ia ka ri bad ka district hi baroh kawei lyngba ka rynsan iakop iakhun kti ne ka Arms Wrestling.
