Shillong, Risaw 17 : Ka skul Little Flower School, Malki kala paw bha shakhmat ha ka National Science Seminar 2023 da ka jinglah jong ka skul ban jop ha ka kyrdan ba-ar ha kane ka seminar kaba la long ha National Science Centre, Delhi myn ha ka 12 tarik Risaw.
Kane ka skul kala paw lyngba ka jinglah jong I samla Sofie Balarisha Rangtong iba shong klas IX, ban ioh khur ia kane ka nam jop napdeng kiwei pat ki khynnah skul jong ki skul ba pawnam ka Ri.
I samla Sofie Balarisha Rangtong ila ioh ruh ia ka khusnam da ka scholarship ba T. 2000 shibnai ka ban treikam haduh 2 snem kynthip namar kane ka jingjop jong i.
Ia kane ka seminar la pynlong da ka National Council of Science states (N.C.S.M.) (Ministry of Culture, Govt. of India) ha ryngkat ka jingiatreilang bad baroh ki Jylla /Union Territories ka Ri.
Lah ban kdew hangne ba I samla Sofie Balarisha ila shah jied ban mihkhmat ia ka Meghalaya hadien ka jingjop jong I kum I lahduh (first prize) ha ka State National Science Seminar kaba long ha ki bnai bala leit noh jong une u snem.
Haba iakren bad ki nongthoh khubor halor kane ka jingjop jong I hynnin ka sngi Nyngkong, ila ong ba I kwah ban pynpaw ia ka jingsngewnguh ia ka National Science Centre kaba la pynlong ia kum ia kane ka lympung, kaba ai ka rynsan ia ki samla kum ma I ban mihkhmat ia ka Jylla.
Ila ong ruh ba ka dei ka kabu kaba khraw bha naba ila ioh ia ka lad ban lum ia shibun ki jingnang jingtip nalor kaei kaba don ha ki syllabus ba pule ha skul.
“Nga kmen palat ba nga la lah ban pynsngew sarong iala ka skul bad ia ka Jylla” ila ong.
Ine I khynnah klas IX ka skul Little Flower ila ong ba i sngewtynnad eh ha ka Biology bad ka jingthmu ha ka jingim jong I ka long ban long I cardiologist (doktor sumar klongsnam).
Ila pynpaw ruh ia ka jingsngewnguh ia ki Nonghikai, Joydeep Das, uba la jied ia I ban mihkhmat ia ka skul ha ka District bad ka State Level Seminar.
I Headmistress ka skul Little Flowr Sr Meris Dkhar ila ong ba ka jingjop jong I Sofir ka dei ka jingsngew sarong ia baroh.
Ila iathuh khana ba baroh kila sdang hadien ka jingshah khot sngewbha na ka Ophis u District School Education Officer (DSEO), uba la khot sngewbha ia ka skul ban iashimbynta ha ka District Science Seminar.
I Sr Dkhar ila ong ba I Sofir ila shah jied hadien ka jingwan ba nyngkong jong I ha ka District bad State Science Seminar.
U Nonghikai ka skul Joydeep Das ula pyntip ba ka mat jong kane ka National Science Seminar ka dei “Millets – A Super Food or a Diet Fad”.
