Nongstoin, Nohprah 1: Ka thain Langpih, kaba don ha ka jingiakajia pud hapdeng ka Meghalaya-Assam, kala sdang paw mynta kum kawei na ki jaka ba manbha ha ka jingrep ia u soh ‘Dragon Fruit’, u soh uba remdor bad uba jur bha ka jingdawa hapoh ka Ri India bad satlak ka pyrthei.
Ka Shlem haba wad jingtip ia kane ka jingrep soh ‘Dragon Fruit’ ha Jylla, kala shem ba kane ka jingrep ka dang don tang ha ka thain Langpih bad la sdang don bun ki briew kiba rep ia une u soh ha ka thain ban kyntiew ia ka kamai ka kajih.
Iwei na ki Nongrep ‘Dragon Fruit’ ha ka thain I dei I Kong Silabon Swangre, iba la thung ia une u jingthung la kumba san-hynriew snem eiei hala ka jong ka phyllaw iing bad ila ioh ban kheit ia ki soh haduh 6-7 sien mynta ban die bad bam sngewbha ialade.
Haba iakren bad Ka Shlem, I Kong Silabon ila iathuh “ Une u Soh u shongdor haduh T.100 uwei lada tad eh ruh bad lada ki briew ka thain ki nang ban minot ban thung, kan long kawei na ki lad kamai kaba jur bha”.
I kong Silabon ila iathuh ba ka jingthung ia une u soh kan shimpor haduh 3 snem ka rta ba un pynmih soh bad u dei ruh u jait jingthung uba pynmih soh haduh lai sien ha ka shisnem.
Nalor kane, ila pyntip ruh ba na ka jingwad jingtip jong i, la shem ba une u soh u dei uba iarap ia ka jingpang shini, jingpang khyllai, jingpang TB bad kiwei kiwei.
“Lada ki diengsoh ki soh tang 10 tylli ha uwei u dieng tang ha ka shisien soh bad lada don bun tynrai, katno shuh kan long ka jingmyntoi ha ka ioh ka kot khamtam ha kum kane ka juk kaba hiran ka kamai kajih” ila ong.
“Nga ialade nga la ioh ban kheit kumba 6-7 sien ia une u soh haduh mynta mynne bad nga sngewthuh katno kan ai jingmyntoi ia ki nongrep ka thain lada ki iathung ia une u soh khamtam haba la iohi shai ba une u soh u man bha ha ka thain jongngi” ila ong.
