Nongstoin, Nohprah 1: Ka kynhun ialehkai jong ka Shillong Lajong FC ka la jam sha ka quarter final jong ka Invitation Knockout Football Tournament 2022-23, ba la pyniaid da ka New Nongstoin Sports Social and Cultural Club ha madan New Nongstoin.
Ka jingioh ruh jong ka SLFC sha katei ka wat, ka la jia long hadien ba ka la lah ban jop noh da lai kol la nod pyrshah ia ka Niaw Wasa FC, ha ka jingialehkai pre quarter final kaba la long hynne ka sngi ha madan New Nongstoin.
Ki paidbah kiba la sakhi ia kane ka jingialehkai, ki la iohi ia ka jingtbit jong ki arliang mamla ban ialehkai hapdeng madan bad bunsien ki la ioh ruh ia ki kabu ban thep kol. Hynrei, ka SLFC kaba don ha ka ia ka bok ka nusip, ka la ioh ban thep shwa ia ka kol kaba nyngkong ha ka kylla step, kaba la long ruh kum ka kol kaba la ai mynsiem ia ka kynhun baroh kawei.
Haba wan ban bteng ia ka kylla miet, ka SLFC ka la nang kham ialehkai bha shuh shuh bad thep ruh sa ia ki ar tylli ki kol kiba pynskhem ia ka kynhun, ban nang jam ha kane ka lympung ha Nongstoin. Ha kawei ka liang, ka Niaw Wasa FC ruh ka la ioh lem ki katto katne ki kabu ha ka kylla miet ban ioh thep kol, pynban imat mynta ka kynti ka nusip kam shym la don bad ka kynhun baroh kawei. Kumta baroh ki kabu ki shu lehnohei lut.
Ha kane ka jingialehkai, ia ka khusnam rang ialehkai ba kynsai la ioh da u Abhay jong ka SLFC. Nangta, ka jingialehkai ka ban long ha ka 9 tarik ha ka por 1:30 noh phai sngi, kan long hapdeng ka Kith United FC na Nongstoin pyrshah ia ka Kumar Himalaya Sporting Club na Sikkim.
