Shillong, Risaw 14 : U Myntri Rangbah ka Jylla Conrad K Sangma hynne ka sngi thohdieng, ula ong ba ka Sorkar Jylla kam pat shongthait satia ban iakren bad ki kynhun bapher bapher ka Jylla na ka bynta ban lah pynpoi lynti rel noh hapoh ka Jylla.
“Ngim pat shongthait ban iakren bad ki kynhun bapher bapher kynthup ki Sengbhalang, ki Rangbah Shnong bad ki Trai jaka ban pynpoi lynti rel. Ka lynti rel ka dei kaba donkam palat bad kan wanrah ia shibun ki jingmyntoi ia ka Jylla bad ia ki Nongshongshnong” ong u Conrad haba iakren bad ki nongthoh khubor.
Hynrei ula ong pat “Kam long kaba suk ia ka sorkar ban shu shim rai ia kane ka kam namar ka jingpyrshah ki paidbah kiba dei ki trai jaka”.
Kat kum ka jingong jong u, dei tang lyngba ka jingiakren lane ban kynthup lang ia ki paidbah ban pynbeit ia ki jingeh baroh, ka Sorkar kan sa lah ban shim rai halor ka jingpynpoi lynti rel.
“Ngi dang bteng ban iakren bad pynsngewthuh ia ki kynhun bapher bapher kiba pyrshah ia ka lynti rel” ula ong.
