Pat ju iakren ka NPP ban wan iasoh u Mukul | Dei ka jingpynman hi ki lad pathai khubor

Shillong, Nohprah 14 : Shibun ki jingiakren antad kila mih ha ka jylli sain pyrthei halor ka jinglah ban kynthih seng u Myntri Rangbah barim bad Nongialam ka Trinamool Congress Dr Mukul Sangma, kaba ki khubor khlieng tyngab ki ong ba u lah ban leit iasoh sha ka National People’s Party (NPP). Hynrei uwei u Heh NPP ula kyntait ia kine ki jingkam bad pynthikna ba ka dei tang ka hamsaia.

“Kam pat don ka jingiakren hapoh ka party. Kane ka dei tang ka khubor khlieng tyngab” ong ka tyllong khubor ba iajan bad ka NPP haba iakren bad u nongai khubor.

Ka khubor ka ong ba kam pat don satia kano kano ka jingkren la ka long ba ka NPP kan iakren ia u Dr Mukul lane u Dr Mukul un aiktien sha ka party halor kane ka jingthmu.

Kaei kaba lah ban ong ka long ba u Dr Mukul u lah ban iakren bad ki katto katne ki nongialam ka party kum ka jingiakren kam shimet, ong ka khubor haba kren shai ba kam don satia kano kano ka jingiakren halor ka jingwan iasoh jong u sha ka NPP.

Haba kylli la ka NPP kan pdiang ia u Dr Mukul lada u wan iasoh, ka khubor ka iathuh ba ka party hi ka plie ia ka jingkhang. “Iano iano ruh ngi pdiang ban wan sha ka party. Ka jingkhang jong ngi ka plie beit” ong ka khubor.

Kane ka jingiapynman kala mih ha ka por ba ki kam sain pyrthei kila sdang ban shongshit ha ri-lum Garo namar ka jingdon ka elekshon GHADC. Ka khubor kala mih ha kawei na ki kot khuborha ka sngi Saitjain ba kam ba u Dr Mukul ula pyniasoh sha ka NPP, ka khubor kaba la pynshong nongrim na ki jingpynman dalade, namar kam pat don satia kano kano ka jingpynthikna la ka dei na u Dr Mukul ne kino kino ki Nongialam ka NPP.

Hato ka lah ban long? Ka jingkylli kaba eh bha.

Hooid ne Em

Kaba nyngkong, Hooid. Ka kyrdan jong ka TMC ha Jylla kala troin bha ha kine ki khyndiat bnai bad bun ki nongialam kila mih na kane ka party. Dang shen, u para jong u Dr Mukul uba dei u MLA barim Zenith Sangma ula leit iasoh sha ka Indian National Congress.

Watla, u Dr Mukul ula pynpaw ia ka jingbym sngewtynnad ia kane ka rai u para bad ong ba u Zenith u lah ban bakla ha ka rukom pyrkhat ba un kynjoh ia ka thong ha ka sain pyrthei ha ka Congress. “U lah ban sngew ba ki jingangnud jong u kin sa urlong lada u kynriah seng, hynrei ula bakla. Ngan sa pynshisha ia kane” ong u Dr Mukul.

Lehse ka dei Em, Balei?

U Dr Mukul bad u Khliehduh ka NPP Conrad K Sangma ki dei ki nongialam ba pawkhmat eh ha ri-lum Garo. Ki arngut ki radbah ha kajuh ka sem ka long kaba eh ba kin iadonlang khamtam ha ki por elekshon namar baroh arngut ki dei kiba paw kum ki nongialam ba lah ban long Myntri Rangbah. Hynrei kiei kiei baroh ki lah ban jia ha ka sain pyrthei.

Ia mynta hi, ka NPP kala kren shai ba ka khubor ba u Dr Mukul Sangma un wan iasoh sha ka party ka dang dei tang ka khubor hamsaia.