Shillong, Rymphang 19 : Ka Myntri ka Tnad ka Koit ka Khiah Kong Ampareen Lyngdoh ha ka sngi Nyngkong, kala pyntip ba kam pat don satia kano kano ka jingtyrwa ban seng ia ka Medical College ha Ri-lum Jaintia.
“Ha kawei ka sngi nga kyrmen ban iohi ia ka Medical College ha Jowai. Ngam lah ban ai kano kano ka jingkular namar ka dei ka jingkular kaba heh bha” ong ka kong Ampareen haba jubab ia ka jingkylli bala wanrah da u MLA ka UDP na Mookaiaw Bah Nujorki Sungoh.
Haba pynpaw ia ka jingbym mynjur bad u Bah Nujorki ba ong ba ki jingtei jongka koit ka khiah ha ka thain ka long kaba sniew bha, ka Myntri kala ong “Ngi sngewthuh ba ki don kine ki jingsngewkhia…Nga sngewthuh ngi donkam ban tynruh hynrei nga la leit iuhkjat ha bun ki hospital bad ngi donkam ban treikam bha bad ngin sa leh ha kine ki khyndiat bnai bad snem”.
Kala ong ba ka Sorkar kam sa bun noh shen ia ka Radiology kat kum ka juk mynta ha Jowai Civil Hospital.
Haba wanrah ia ka jingkylli bynrap ha ka kynta kylli jingkylli, u Bah Nujorki ula pynpaw ia ka jingsngewkhia halor ki jingtei jong ka tnad ka koit ka khiah ha Ri-lum Jaintia bad ong ba ki dei kiba don shibun ki jingduna.
Ula kyrpad ruh ia ka Sorkar ba kan mynjur ha kaban buh ia ka Primary Health Centre (PHC) ha Psiar kaba don ha khappud ka Assam. Kat kum ka jingong jong u, ka Shnong kala dep ban ai sngewbha haduh 4 acre ka jaka na ka bynta kane ka kam.
Halor kane, ka Myntri kala kular ba ka Sorkar kan sa khmih ia kane ka jingtyrwa.
“Ka jingtyrwa kala wan na Psiar. U MLA ula trei shitom bha bad ngi dang shong bishar ia ki jingdonkam baroh bad ngin sa khmih la ka Psiar ka dei ne em ban ioh ia kane” kala ong.
