Shillong, Lber 13 : Ka Sorkar Jylla kam pat don jingthmu ban buh ia ka jaka theh niut kat kum ka juk saian ha shnong Mawkhanu, kaba hap hapoh ka New Shillong Township.
“Ka Sorkar kam pat don jingmut ban buh ia ka jaka theh niut ka juk saian ha katei ka jaka” ong u Symbud Myntri Rangbah ki kam pynroi sor Bah Sniawbhalang Dhar haba jubab hapoh ka Iingdorbar ha ka sngi Palei.
U MLA ka VPP na Mawlai u la ai jingmut ia ka jingdonkam ba ka Sorkar kan shna ia ka Waste Management Plan ia ka Mawkhanu. Kat kum ka jingong jong u, ka Sorkar kala dep ban thied ia ka jaka haduh 800 acre ha Mawkhanu.
Halor kane, u bah Sniawbha ula ong ba ka daw ba ka Sorkar kan buh ia ka jaka theh niut ha Mawkhanu ka dei namar kala tyrwa ia ka jaka thymmai ha Nonghali haba bynrap ba ka jaka ba donkam ban buh ia ka jaka theh niut ka long hapdeng 100-150 acre.
Nalor kane, u Symbud Myntri Rangbah ula pyntip ba kam pat don satia ka jingthmu ban pynkylla ia ka jaka sha ka European Ward haba bynrap ba ka Sorkar ka dang pynkhreh mynta ia ka master plan.
Ula jubab ruh ba ym don satia ki nongbuhai shnong beain ha ka thain Mawkhanu haba kular ia u MLA ka VPP na Nongkrem ba u long uba la khreh ban pynlong ia ka jinghiar jurip ia ka thain.
