Shillong, Nailur 22: U Myntri ka Sorkar Jylla bad MLA ka Jirang Bah Sosthenes Sohtun ha ka sngi Ba-ar u pyntip ba ula shimkhia ban iakren ia kane ka huri hura Maikhuli bad u Myntri Rangbah ka jylla bad u Symbud Myntri Ragbah ka jylla, kiba la phah mardor ia ki pulit ban pynthikna ia ka jingsuk bad jingshngain ia ki nongshong shnong.
“Ka jingleit ka jong nga sha Maikhuli hynin ka sngi, kadei hadien ba kala mih ka jingiakajia ha ka sngi Saitjain ha kaba kila don ki kynhun kiba la wan sha Maikhuli bad pyrshang ban khang ia ka khyrdop kaban leit sha Madan bad kila byrngem ruh” ong u Bah Sohtun.
Ula ong, hadien ba ula ioh jingtip na u Rangbah Shnong bad ki seng kynthei, kumta ula pyntip mardor sha ki bor pyniaid district ban leh ia kaba donkam.
“Nga lah pyntip ruh sha ka tnad pulit bad u Deputy Commissioner bad nga lah ioh ruh ban kren ia u Myntri Rangbah, Symbud Myntri Rangbah ban shimkhia bad ka jylla Assam bad kila phah ia ki pulit ban pynthikna ba ki nongshong nongshong kin ioh ban shong da ka jingsuk” ula ong.
U Bah Sohtun ula ong, ba ula leit ha ka Sngi Nyngkong ban khmih ia ka jinglong jingman bad lum ia ki jingialang bad ki nongialam shnong, ki seng kynthei bad kiwei pat ki Rangbah Shnong kiba don ha ki jaka kiba hap hapoh ka jylla Meghalaya, ha kaba ki nongshong shnong kila pynpaw ia ka jingsheptieng.
“Hynnin ka sngi, nga lah leit ban khmih ia ka jinglong jingman bad ia kaei kaba la jia bad kidei kiei kito kiba la wan ban byrngem ban pynibor ha katei ka jaka, u Rangbah Shnong ula pynpaw ba kala don ka jingsheptieng” ula ong.
U Myntri ula ong, ba ka sorkar ka kwah ba ki nongshong shnong ha khappud kin im khlem kano kano ka jingsahh byrngem byrsit.
“Na ka liang ka sorkar, ka kwah ba ki nongshong shnong kiba shong basah ha thain khappud bad kiba lait na kino kino ki jingshah byrngem, jingshah thombor ne shah pynibor” ula ong.
Ula ong, ba ki trai shnong kila kyrpad ban buh shirta ia ki pulit ha ka thain bad ia kane ka jingdawa kadei kaba la shimkhia.
“Kila kyrpad ban buh shirta ia ki pulit ha ka thain, nga lah iakren bad u Symbud Myntri Rangbah bad u ruh ula phah da u SP bad DC ban aiti ia ka kaiphod halor katei ka jingjia bad ban khmih bniah ia kiei ki sienjam kiba dei ban shim ban buh shirta ia ki pulit ha kane ka thain” ula bynrap.
U Bah Sohtun ula pynshai ba ka Madan ka hap hapoh jongka shnong Maikhuli bad ula kynnoh ba katei ka kynhun kala pyrshang ban wan kyntur pud jubor.
“Ngi lah leit shatei mynin ka sngi namar ba ka jingwan ka jongki kala long ha kata ka rukom ba ki kwah ban byrngem bad pyndik hynrei hadien ba ki bor district bad ki paid nongshong shnong ka Maikhuli kila ieng tylli kawei bad pynthikna ba kitei ki briew kila wan ban kyntur pud jubor ha ka jaka kaba ym dei satia ka jongki” ula ong.
Ula ong, ba ym baroh ki jingkajia ha khappud kidei namar u pud u sam, hynrei ki don kiba la thaw hi da ki briew ban ioh shimkabu.
“Ki don ki khep ba ki briew ki kwah ban shim kabu bad ban pynlong ia ka kum ka ishu ne mat na ka jingjia, ki nongshong shnong ki don lypa ia ka jingpyrkhat, hynrei ki paidbah kiba sah hapoh ka jylla ki kwah ban im da ka jingsuk bad kim kwah ia kano kano ka jingiakynad” ula ong.
Da kaba wer ban pynkhlain ia ka jingai jingpahara ha ki thain khappud, u Bah Sohtun ula ong, “Kum u MLA na ka thain khappud, nga lah phah ia ka jingtip sha ka sorkar khamtam sha ki pulit kiba don ha khappud kaba mih katei ka jingjia, ki Police Outpost ne ki pulit dei ban pynkhlain shuh shuh ban pynthikna ba ki briew ki jong ngi kidei ban shong da ka jingsuk.
Ha kaba iadei bad ka wat baar jong ka jingiakren pynbeit pud ula ong, “Na ka liang ka sorkar kala shim ia ka jingkitkhlieh naduh ka wat kaba nyngkong bad nga kyrmen skhem ba ha ka wat ka baar bad nga kyrpad ia ka sorkar na ka liang ka jong nga uba don ha ka sorkar, ngan sa iakren bad ka Committee ban pynsted khnang ba baroh arngut ki Myntri Rangbah ki lah ban iakren noh ban pynbeit ia u pud u sam ha ka wat ka baar”.
