Iakynduh ki bor District ka Ri-Bhoi bad Kamrup ban tehlakam ia ka suk ka sain ha Maikhuli

Nongpoh, Nailur 22 : Ki bor District ka Ri-Bhoi bad ka Kamrup Metropolitan, kila shong jingialang ha ka sngi Ba-ar ban iasyllok ha kaban wanrah pat ia ka shongsuk shongshngain ha ka shnong Maikhuli hadien ba mih ka jingiakynad ba poi sha ka jingiakhru marmet hapdeng ki trai shnong bad ki briew na Assam ha ka sngi Saitjain.
Ia kane ka jingialang la pynlong ha conference hall ka Basistha Chariali, Guwahati. Ia ka Jylla la mihkhmat da u N. Hajong, MCS, Additional Deputy Commissioner (ADC), Ri Bhoi, katba na Kamrup la lamkhmat da u Biman Das, ACS, Co-District Commissioner, Dispur, Kamrup Metropolitan, Assam.
Ka jingialang kala shim ia ka rai ban iatreilang bad ban pynkhlain ia ka jigniadei hapdeng ki bor synshar bad ki Pulit jong baroh artylli ki district khnang ban lah pynneh ia ka shongsuk shongsain ha ka thain.
La rai ruh ba lada don kino kino ki briew na Assam kiba wan pynkulmar ne wanrah ia ka huri hura ha Maikhuli, ki nongshongshnong ki dei ban pyntip mardor sha ki Pulit ka Basistha Police Station, Assam khnang ba ki Pulit kin lah ban shim iaki sienjam kiba donkam.
Ha kajuh ka por, lada don ki briew na Meghalaya kiba leit ban mushlia ne thaw jingkulmar ha Maikhuli, la kyntu ba kin pyntip mardor sha ki Pulit ka Pilangkata Outpost ba kin tehlakam kat kum ka lynti ka ain.
Kiba iadonlang ha ka jingialang ki kynthup ia u M. Marngar, MPS, Additional Superintendent of Police, Ri Bhoi, ryngkat ki heh pulit na Khanapara Police Station bad Pilangkata Police Outpost, lem bad kiwei pat ki heh pulit na Kamrup, Assam.
Kane ka jingialang ka dei kaba la pynlong halor ka jingbthah jong u Deputy Commissioner ka Ri-Bhoi Dr. Abhishek Saini, bad u Deputy Commissioner ka Kamrup Metropolitan Swapneel Paul.