SPL-2026 | Kiew ka Langsning ha ka kyrdan ba hakhlieh duh da ka jingjop ia ka Nangkiew

Shillong, Nailur 22 : Ka Langsning FC kaba bat ruh ia ka nam kum ka lahduh ha ka samoi bala lah, ka la pynliem ia ka Nangkiew Irat da 3-0 bad kiew halor duh jong ka miej iakhein point ka Shillong Premier league 2026 hynne ka sngi Nyngkong ha SSA Stadium.
Ia kine ki lai tylli ki kol, ka Langsning FC ka la ioh ban thep ia ki ha ka kylla miet lyngba u Samuel Phawa (65’), Syed Ahmed (70’) bad Mebanshngain Kurkalang (79’).
Da kane ka jingjop, ka Langsning ka la ioh ban khur 13 point na ki 6 sien ialehkai, bad tam kylla da ar point ia ka Mawlai bad Shillong Lajong, katba na ka liang ka Nangkiew Irat kala iai neh ha ka kyrdan ba 8 hadien ba ka la khur 7 point.
Ha ka kylla step, ka Nangkiew Irat ka iakhun tyngeh bha bad ka khlem ailad ia ka Langsning ba kan pyniaid ia ka jingiakhun, pynban haba wan ban bteng pat ia ka kylla miet, ki khnap ki rang ialehkai suki pa suki ki la sdang ban tlot, bad plie lad ia ka Langsning FC ba kan ioh ba kan thep ia kitei baroh lai tylli ki kol.
Haba wan ban bteng ia ka kylla miet, ki rang ialehkai ka Langsning ki la rai kut ba ka por kam shah shuh ia ki ban shu ialehkai jem jai, pynban marsien ia sdang ki la lah ban kham pynsted ia ka rukom ialehkai bad ka la sdang ba kan pynstait ia ki ktang lyer jong ki rang ialehkai ka Nangkiew.
Ka kol ba nyngkong ka Langsning ka wan lyngba u Samuel uba la wan ban mih na ka ben shong (substitute) hadien kane, u Ahmed pat u la ioh ba un head suk ia ka bol kaba la poi hajan jong u bad khatduh u Mebanshngain .
Lashai ka sngi ka jingiakhun kan long hapdeng ka Rangdajied United FC pyrshah ia ka Nongkseh SSCC kaban long ha ka por 3 baje nohphai sngi.