Shillong, Risaw 12: U Myntri ka tnat kam pohïng bah Lahkmen Rymbui hynne ka sngi Balang ula pyntip ba ka tnat kam pat ioh satia iaka kaiphod naki Bor District haba iadei bad ka jingshah kawang bomb pynsat khmat ki nonghikai haka por ba ki iakhih.
Haba kren sha ki lad pathai khubor u bah Lahkmen ula ong “Naduh ka 7 tarik, nga la pan ia ka kaiphod naki bor district halor ka jingjia ba 6 tarik Risaw bad haduh mynta ka kaiphod kam pat poi shaka tnat”.
“Nga kyrmen ba shen kane ka kaiphod kan sa poi haka miej jong nga bad hadien kane ngan sa lah ban leh iaka ba donkam” la ong u bah Lahkmen.
U bah Lahkmen ula ong ba ka sorkar kam iada ne buhrieh iano iano hynrei ka sorkar kan sa leh iaka ba donkam katkum ki kyndon jong ka ain.
