Shillong, Jymmang 14 : Ka Iingkashari Meghalaya High Court kala pan ia ka kaiphod ba thymmai halor ki hynriew tylli ki mukotduma kam bymman ba dang sahteng pyrshah ia ki MP bad MLA hapoh ka Jylla.
Ka Iingkashari bala khlieh da u Justice HS Thangkhiew ha ka hukum ba pynmih ha ka 13 tarik Jymmang kala ong “Buh ban bishar biang ia kane ka kam ha ka 1 tarik Nailar, 2025 na ka bynta ka jingwanrah ia ka kaiphod ba thymmai”.
Ka kaiphod balafile da u GA ha ka 9 tarik Jymmang ka pyni ba ki dang don 6 tylli ki mukotduma ba dang sahteng ha ki lai tylli ki District ba kynthup ia ka East Khasi Hills-3 tylli ki case, West Jaintia Hills-1 ka case bad West Garo Hills-2 tylli ki case.
“Watla ka jingiaid ka kam ka dang long kumjuh, la I ba haba iadei bad ka Special CBI case No.2 of 2020, ka jingdon jong ki nongaisakhi la pynduna na ka 492 sha ka 181 bad 28 haduh mynta kiba la dep ban bishar” ong ka Iingkashari. Ka Iingkashari kala kynthoh ia kane halor ka jyrsieh thungkam nonghikai ha Jylla kaba donbynta ka Myntri ka Koit ka Khiah Kong Ampareen Lyngdoh.
