Nongpoh, Jymmang 14 : Kawei ka kali tourist ba rem dor kala kylla khongpong ha surok NH-06 ha Ri-Bhoi tang namar ka jingsuba ba iaphoi u nongniah ka kali bad ka kurim hapoh ka kali ba dang iaid.
Kane ka kali ka dei ka Hyundai Xcent kaba don u nombor ML04-D-0396. Kane ka jingjia kala jia ha ka por 8:40 baje hynne ka miet hajan ka shnong Mawdiangum, hajan Nongpoh, Ri-Bhoi District.
Kat kum ka khubor Pulit, la iathuh ba kane ka kali kala leit ban jynrat ia ka jingker ba pyniakhlad liang jong ka surok NH-06 hashuwa ba kan kylla khongpong.
La iathuh ba kane ka kali ka dei kaba dang thmu ban kiew sha Shillong hynrei tang mar iapoi ha katei ka jaka hajan Mawdiangum, ka kurim jong une u nongniah, kala tan pyrdet kynsan kynsan ia u stering jong ka kali, kaba poi sha u pud ban leit tynrah ia ka jingker jong ka surok bad sa kylla.
Ki paidbah kiba iohi ia katei ka jingjia, kila leit ban tur shajan ka kali ban ai jingiarap hynrei kine ki arngut ki shikurim kila phet pynban na katei ka jaka.
Ki Pulit ka Nongpoh Police Traffic Branch kila hiar tohkit ia kane ka jingjia bad kila tan noh ia ka kali sha thanad. Ki Pulit ki dang wad mynta ia u nongniah jong katei ka kali.
