Shillong, Naitung 24 : Ka Myntri ka Koit ka Khiah Kong Ampareen Lyngdoh ha ka sngi Nyngkong, kala pan ia ka kaiphod na ka North Eastern Indira Gandhi Regional Institute of Health & Medical Sciences (NEIGRIHMS) halor ka jingiap u samla, uba la wan shah sumar hapoh ka Hospital na ka jingmynsaw ha ka jingaksiden kali ha Damsait ha ka sngi U Blei.
“Hooid, nga la pan ia ka kaiphod. Ka shithi jong nga ka dang shu leit sha u Director ka NEIGRIHMS da ka jingkyrmen ba ngan sa sngewthuh kham bha ia kaei kaba jia” ong ka Kong Ampareen haba iakren bad ki nongthoh khubor.
“Nga phah ia ka jingsngewlem sha ki bahaiing kiba la duh noh iala u baieid bathoin. Bad nga kular ia kane ka Longiing ba ngan tohkit bad ngan kylli ia kaei kaba jia” kala bynrap.
Ha ka sngi U Blei, ka jingkulmar kala mih hapoh ka Emergency Unit jong ka NEIGRIHMS hadien ba uwei u samla ula iap na ka jingmynsaw.
Ki bahaiing une u samla kila kynnoh ba k aka Hospital ka la leh bym suidniew ia ka jingsumar bad ba ym shym la don doktor satia hapoh ka Hospital ha kaba la shu ieh ia une u samla ban thiah mynsaw khlem ka jingsumar haduh san kynta.
Haba kylli, ka Myntri kala ong ba kam don bor satia ban phah ia kano kano ka jingtohkit halor kane ka jingjia.
Haba pynpaw ba ka NEIGRIHMS ka dei jong ka Sorkar Pdeng, ka Kong Ampareen lyngdoh kala ong ba ka dei pat ka kamram jong ka Sorkar Jylla ba kan don ki khmat bad ki skhor halor kane ka hospital.
Kala pyntip ruh ba kan sa wad ia ka jingshisha la ka dei ne em ba ym shym la don doktor ha katei ka por ba wanrah ia une u samla ba mynsaw.
“La pyntip sha nga ba ki don ki doktor khynnah….kumta nga la kyrpad ia u Director ka NEIGRIHMS ba un pyntip sha nga ia kiei kiei baroh kiba jia. Hadien kane, hooid, ngan sa lah ban pyntip ia ki rai ban sa shim bad u” kala bynrap.
Pule lang ia kane: Thombor ki runar ia ki riewngeit Hindu katba dang leh niam ha Mahadev Khola
