Shillong K’lyngkot 27 : Ka Regional Committee ba khlieh da u Symbud Myntri Rangbah Bah Sniawbhalang Dhar, kala pan ia ka kaiphod halor ka jingdon ki shnong hapoh ka thain Block-I, West Jaintia Hills District.
“Ha ka jingialang ba long ha u Nohprah 2024, nga la aipor lai bnai ia u Deputy Commissoner ban pynioh shuh shuh ia ki jingtip bad aiti ia ka kaiphod haba iadei bad ki shnong kiba don ha khappud, ka jingdon ki nongshongshnong bad ki Jaidbynriew aiu” ong u Bah Sniawbha haba iakren bad ki nongthoh khubor ha ka sngi Nyngkong.
“Kumta, u DC un sa wanrah sha ka Regional Committee ban aiti ia ka kaiphod sha ka Sorkar. Ka Sorkar kan sa iakren pat bad ka Assam hadien ba ki arliang mamla kila mynjur ban iakynduh” ula ong.
U Bah Sniawbha ula pyntip ba ka kynhun jong ka Hynniewtrep Achik National Movember (HANM) kala wan ban iakynduh bad kyrpad halor ka jingdonkam ban pynkloi noh ia ka jingpynbeit ia ki jaka khappud ba iakajia.
“Nga iathuh ha phi ba ka Regional Committee ka Meghalaya bad Assam kin sa iakynduh hadien ka elekshon jong ki Autonomous District Council (ADC)” ula ong.
Ka Meghalaya bad Assam kin sa sdang biang shen ia ka jingiakren pynbeit pud jong ka wat kaba ar ban iapynbeit sa ia ki hynriew tylli ki jaka ba dang don hapdeng ka jingiakajia hapdeng ki arjylla.
Kine ki hynriew tylli ki jaka ki kynthup ia ka Langpih ha West Jaintia Hills, ka Borduar, Nongwah-Mawtamur, Deshdoomreah, Block-II ha Ri-Bhoi District bad ka Block-I, Psiar-Khanduli ha West Jaintia Hills District.
Ha ka dorkhas, ka HANM kala kyrpad ia ka jingtuklar jong u Symbud Myntri rangbah ban leh eiei halor ki jingeh ba iakynduh da ki paidbah kiba sah ha ki jaka khappud namar ka jingbym ioh ia ki kam pynroi.
“Ngi kyrpad ia phi ban iakren lem ia kane ka kam bad ka Sorkar Assam bad ka Sorkar India, lada donkam, ban pynthikna ba ki briew jong ngi ki ioh ia ka jingbishar ba hok bad ka jingisynei kaba ki dei ban ioh” kala ong.
