Shillong, Nailar 26: Ka Iingkashari Meghalaya High Court hynne ka sngi thohdieng kala pan ia ki kot ki sla ba shisha (original record) kiba iadei bad ka jingjied ia ki briew ha ka jingthungkam nongniah kali hapoh ka Tnad Soil & Water Conservation ka Jylla.
Ia kane ka hukum la pynmih da ka Iingkashari ki arngut ki nongbishar ba kynthup ia u Chief Justice Sanjib Banerjee bad Justice W Diengdoh hadien ba shong bishar ia ka mukotduma ba la mudui da u Bah Pynskhemlang Nongrang, uba la buh dak jingkylli ia ka result thungkam nongniah kali ha kane ka tnad.
“Ki Nongshah mudui ki dei ban ai ia ki kot ki sla ba shisha ba iadei bad kane ka jingthungkam, kynthup naduh ki marks ba la ioh da ki nongialeh eksamin ha ka interview bad ki jingkynthoh, lada don. Dei ban wanrah lut ia baroh ki kot ki sla jong ka interview lem bad kiwei kiwei ki kot ki sla” ong ka hukum.
Kane ka eksamin thungkam ka kynthup ia ar bynta: Ka practical test ban peit ia ka jingnang niah kali bad kawei pat ka dei ka interview.
Ka hukum ka ong ba dei ka Jylla kaba buh 50% ka mark ban ai ha ka physical test bad 50% ha ka interview. Ka Iingkashari kala buh ban bishar biang ia kane ka kam ha ka 1 tarik u Nailur.
