Shillong, Jylliew 13 : Ka Iingkashari Meghalaya High Court kala aipor ia ka Sorkar Jylla ba kan aiti ia ka kaiphod halor ki kam ba kala leh ban pynsangeh noh ia ka jingpom dieng beain ha Jylla baroh kawei, hapoh ka 24 tarik Jylliew.
Ha ka hukum ba pynmih ha ka sngi Palei (12 tarik Jylliew) ka Division Bench ba kynthup ia u Chief Justice IP Mukerji bad Justice W Diengdoh kala ong “Namar kata, ngin pynjlan ia kane ka PIL tad haduh ka 24 tarik Jylliew 2025, ban pynlah ia ka Sorkar ba kan aiti ia ka kaiphod. La kumno kumno ruh ka jingpynsdang ia ki kam bad ki sienjam bala shim ha kane ka bynta dei ban pyni ha ka kaiphod”.
Kane ka PIL ka kyrpad ban pynmih ia ka hukum na ka Iingkashari ban pynsangeh noh ia ka jingpom dieng beain ne pathar ha ki jaka ba sawdong ka Lower New Colony, Laitumkhrah.
Hynrei, ka Iingkashari kala rai ban pyniar ia ka jingteikam jong kane ka mukotduma ban kynthup lang ia baroh kawei ka East Khasi Hills bad hadien ban kynthup ia baroh ki kam ba dei ban leh ha baroh ki District ka Jylla.
Da ka hukum ba 9 tarik Iaiong, 2025, ka Iingkashari kala bthah ia ka Jylla ba kan aiti ia ka kaiphod haba iadei bad ki kam ba kala leh kat kum ki hukum ban pynsangeh noh ia ka jingpom dieng beain.
Hynrei, ym shym la leh eiei satia kat haduh mynta namar ka Sorkar kam pat aiti satia ia kano kano ka kaiphod.
Namar kata, u Additional Advocate General, ND Chullai ula kyrpad ban aipor ha kaban aiti ia ka kaiphod.
