Shillong, Jylliew 13 : Ka Iingkashari Meghalaya High Court kala bthah ia ka Sorkar Jylla ba kan ai ia ka affidavit ba pyni ia kiei ki kam ba kala leh halor ka Meghalaya State Vendors (Protection of Livelihood and Regulation of Street Vending) Scheme, 2023.
Ka Divison Bench ba kynthup ia u Chief Justice IP Mukerji bad Justice W Diengdoh haba pynjlan ban shong bishar biang ia ki 2 tylli ki PIL halor kane ka kam tad haduh ka 3 tarik Naitung, kala ong “Hapoh ka 1 tarik Naitung, 2025, ka Jylla ka dei ban ai ia ka affidavit ba pyni ia ki kam ba kala leh halor ki hukum jong ngi bad ka skhim bala kdew haneng bad ban phah ruh ia ka copy sha u Advocate-on-Record na ka bynta u nongmudui”.
Kala bthah ruh ia ka Jylla ba kan khmih bad leh eiei halor ki jingbatai (statement) bala thoh hapoh ka affidavit bala aiti da u nongmudui.
Ka Iingkashari ka ong ba ki don ki pasoh ha kane ka jingbatai hapoh ka affidavit ba ong “La paw ba watla ka Sorkar kala shim ia ki sienjam ban pynrung kyrten gia ki nongshongmadan bala ioh bor, ban ithuh bad ai jaka ban pynlong jaka shong dukan madan da ka jingthmu ban pynieng ia katto katne spah ki dukan bad ban pyntreikam ia ka polici ban pynkynriah ia kine ki nongshong dukan madan sha sha ki jaka shong ukan madan bala ithuh, ka skhim bala jer kyrteng Meghalaya State Vendors (Protection of Livelihood and Regulation of Street Vending) Scheme, 2023 ka dei ka bym pat pyntreikam satia”.
“Namar kata, ka jingeh ia ka jingkyntur beain sharud ki surok bad lynti iaid kjat nalor ka jingpynkhapngiah ka dang iai bteng sah. Kane ka buh jingma ruh ia ki khynnah skul ki bym ioh iaid satia na ki lynti iaid kjat bad hap ban iaid na surok, haba buh ialade ha ka jingma na ka jingshah tynrah kali” kala ong.
 Scheme, 2023.){kind=link}