Nongstoiñ, Nailur 10: Ka seng Meghalaya Youth Federation (MYF) kala leit pan jingpynshai na u District Medical & Health Officer ka West Khasi hills halor ka jing bym lah shuh jong ka Tnad ka Koit ka Khiah ban plie ia ka Maternity & Child Health (MCH), Hospital ha Nongstoin ka ban ai jingsumar kyrpang ia ki longkmie ba armet bad ki Khunlung.
Ka MYF hapoh ka jingïalam jong u Bah Hamar Lyngkhoi kum u President bad samla Pliebok Hoojon President jong ka Nongstoiñ Circle, kila pynpaw ba naduh ar snem mynshuwa la dep ban tei ïa ka ïing na ka bynta katei ka jaka sumar bad la dep ruh ban thung ïa ki nongtrei ha katei ka jaka.
“Hynrei, haduh mynta ka tnad ka koit ka khiah, kam pat lah ban plie ïa ka bad kane ka pyni ba ka sorkar ka shu wan tei mot ym ba ka wan buh ïa ka jaka sumar ban ai jingshakri ia ki paidbah” kila ong.
Ka seng ka dawa ïa ka sorkar ba ka dei ban plie noh mardor ïa katei ka jaka sumar, na ka bynta ban ai jingshakri kaba pura ïa kito kiba donkam ïa ki jingshah sumar ba kyrkieh, khamtam ïa ki khunlung khynnah bad longkmie ba ar met.
Ha kajuh ka por ka seng ka la dawa ruh ba ka sorkar kan plie bad pyntreikam pura noh mardor ïa ka Blood Bank ha Nongstoiñ Civil Hospital, namar ka wanrah jingeh lada wan jia kino kino ki jingshitom kiba hap donkam snam kyrkieh.
Kumjuh ruh na ka liang ka seng WKSU hapoh ka jingïalam jong u President Bah D.Sun, ki la dawa ia ka sorkar ban plie noh mardor ïa ka Maternity Children Hospital (MCH) bad ban mang tyngka noh na ka bynta ki post bapher bapher kiba dei ban don ha katei ka jaka sumar.
Kane ka seng ka la pynpaw ruh halor ka jingdonkam ban sdang ban pyntrei noh ïa ka skul ANM kaba dei ban buh ha Mawkyrwat South West Khasi Hills, kumba ka sorkar hi ka la pynbna naduh ba sdang ban tei ia ka ha Laitlawsang.
Ki nongïalam ka WKSU ki la leit ruh ban ïakynduh ïa ka DM&HO Nongstoiñ, halor ka MCH hospital ha Nongstoin, iba la pyntip ba ka Tnad ka dang ap ia ka rai jong ka sorkar ban mang noh ia ki kam ba dei ban thung briew.
