Shillong, Nailur 10: Hynriew ngut ki koidi ba kynthup ia u I Love You Talang uba dang shu shah kem shen na ka kam pyniap briew, kila lait phet tuh hynne ka sngi Saitjain na Jowai District Jail.
Kine ki koidi kila ioh phettuh ha ka por 1:30 janmiet, ong ki Pulit ka Jowai.
Ki san ngut kiwei pat ki kynthup ia u Ramesh Dkhar, Rikamenlang Lamare, Marsanki Tariang, Shidorki Dkhar bad Lodestar Tang.
Ki heh Pulit ki iathuh ba kine ki koidi kila phet tuh na main gate bad kila shoh pynmynsaw ia u Pulit ba pahara tang marwei ha kane ka phatok.
U I Love You Talang bad u Ramesh Dkhar ki dei kiba dang shu shah kem shen halor ka jingdonkti ban pyniap klep ia uwei u nongniah taxi kamai ka sor Jowai ba kyrteng u Damehipaia Papeng, uba la jah rngai naduh ka 10 tarik Nailar.
Kat kum ka khubor ki Pulit, u I Love You Talang u dei ruh u snar pyniap briew uba la don bun ki case ha Jowai Police Station.
Ha ka jingtohkit ki Pulit, u I Love You u la phla ruh ba u donkti ban pyniap ia uwei u nongniah kali tourist ba kamai na Jowai sha Shillong uba la tip kyrteng u Fullmoon Kharsahnah, uba dei na ka shnong Larnai, West Jaintia Hills.
Ki Pulit kila pynmih ia ka lookout notice sha baroh ki thanad ban thwet ia kine ki koidi.
La kyntu ruh ia ki nongniah kali tourist, taxi kamai bad wat ki bad ba kin husiar bad phikir bha ialade.
