Shillong, Naitung 12 : Ka Iing Bishar Meghalaya High Court ha ka sngi Nyngkong ka la bthah ia ka sorkar jylla ba kan kdew shai la ki kwah ne em ban don ia ka kad liengsuin kaba kham heh ha ka jylla.
Ha ka hukum, ka kynhun bishar ba arngut ba kynthup ia u Chief Justice Sanjib Banerjee bad Justice W Diengdoh ka la ong, “ Ai ba kane ka kam kan wan biang hadien ar taiew na ka bynta ka jylla ba kan kdew la ki donkam ne em ban don ia ka kad liengsuin kaba kham heh lane ka jingkiew ha ka ioh ka kot kaba dang duna bha.”
Ka jylla ka la dep ruh ban pyntip ba watla ia ka Expression of Interest na ki paidbah la dep ban pynjlan kumjuh ruh ia ka por ban pdiang ia ka jingai jingmut, tang katto katne kiba mih shakhmat tad haduh ka 06tarik Naitung ha kaba ka sorkar jylla ka dang don mynta ha ka jingpynkhreh. Na ka liang ka sorkar jylla ruh ka dang pan por shuh shuh ban ai jingtip halor kane.
Ka Airports Authority of India (AAI) ka la pyntip ba ka jingpyrshang ban tyrwa kan ym lah ban seisoh namar ka jylla ka dang hap ban wad ki jaka kiba iahap ryngkat ka jingsyllok lang bad ka AAI ha shwa ba kan ia kren pat bad ki trai jaka lane shim ia ka sienjam ban thied lane skud jaka katkum ki kyndon ain.
Halor kane ka bynta, ka AAI ka kdew ruh ba ka don ka jingeh namar tang na ka bynta ki kad liengsuin rit ha Umroi ruh ki nongkhlieh dor ki hap ban da ioh shwa ia ka trading licence ba kin lah ban khlieh dor.
Kumta, na ka liang ka Iing Bishar ka la ong ba ki kyrmen ba ka jylla kan thaw ki lad ki lynti kumno ban ioh ia ka jaka na ka bynta ka kad liengsuin kaba paka, lada ka sorkar jylla ka thrang shisha ban don ia kum kitei ki projek ban urlong.
“Lane, la ka long ha kano kano ka rukom ruh, ka jingpyrshang ban tyrwa biang dei ban sangeh noh bad ym dei shuh ban pynlut biang ha katei ka bynta,”ka la ong.
Nalorkata, ka Iing Bishar ka la ong ba ki la paw ruh ba ka Khasi Hills Autonomous District Council, ha u pud u sam jongno ka treikam ba ka pynjari da ka bai laisen ha kaba ki don ruh ki ophisar kiba pyrshang ban dawa pisa.
La ong ruh ba kum ia kitei ki jingujor ka AAI ka la dep ban phah sha ka sorkar jylla hynrei khlem poi shaei shaei ruh.
Kumta, ka Iing Bishar ka la rai ruh ban kynthup lang ia ka KHADC ha ka thup ki nongshah ujor ban ioh jingshai halor ka bai laisen.
Shwa kane, u ASG haba mihkhmat ia ka AAI u lapynpaw ba ka long kaba donkam ban ioh ia ka jaka na ka bynta ban ioh ia ka kad liengsuin kaba paka ban shakri ia ka jylla khnang ban pynduna iaka por leit por wan na Shillong sha Guwahati.
U ong ruh ba ka jingshna ia ka kad liengsuin kan long ruh ka lynti ban wanrah bun ki kam kamai kaba lah ban kyntiew ia ka ioh ka kot ha ka jylla kynthup ia ka kam jngohkai pyrthei.
Haba bteng halor katei ka phang, u ASG u kdew ruh ba ki don ruh ki tnad treikam jong ka sorkar pdeng kiba treikam ha ka jylla ki ju kyrpad iaka jylla ban ioh jaka shuh la ka long naduh ka Assam Rifles lane ki BSF bad wat ka Indian Oil Corporation Limited, hynrei ka jyla kam shym la shimkhia halor kane ka bynta.
La ong ruh ba lada ki tnad shipai khamtam kum ka Assam Rifles kaba don ia ka headquarter ha Shillong, ka donkam ia ka jaka ban iada ia ka ktem shipai jong, donkam ia ka jaka hapoh ka nongbah Shillong hi, ka sorkar jylla kadei ban shim khia halor kane ka bynta.
Nalorkata la ong ba watla ka IOCL ka don bynta ha ka jingpynkhreh ban pynieng noh da ka bottling plant na kabynta ka LPG ha Ri Bhoi, hynrei lada donkam pat ia ka bottling plant kaba kham heh na ka bynta ka petrol lane kiwei pat kiba iadei lang bad ka, kane kan wanrah ia ka jingmyntoi ia ka jylla la ka long ha ka khajna ym kumba long baroh shi katta ha kaba ia ki umphniang kum ka petrol bad diesel la hap ban wanrah beit na shabar da ki tanker ban pyndap ha ki station bapher bapher kiba don ha ka jylla.
Kumta, la ong ba ha kaba khatduh hi dei ka jylla kaba hap ban shimkhia halor kane.
Ka Iing Bishar ka ong ruh ba lada ki bor pyniaid ia ka sorkar kim kwah ia ki kam pynroi lane kam shimkhia halor katei ka bynta kaba lah ban wanrah ia ka lad iohkam iohjam na ka bynta ki nongshong shnong ka jylla da kaba pyntikna ba kan ym don pat ka jingktah ia ka mariang bad ki sawdong sawkun jong ka, ka Iingbishar ka don pat laka jong ka bor ban pynbor ia ki bor synshar ban leh.
Halor kane, la ong ruh ba kadei ka kamram jong ka sorkar ban rai kumno ban leh, la ka long na ka bynta ka jingbha jong ka jylla bad ki nongshong shnong khamtam eh da kaba buh hakhmat na ka bynta kito ki samla kiba la nang la stad jong ka jylla.
