Agartala, Naitung 12: Ka Trinamool Congress (TMC) kan pyntreikam da ka rukom synshar ka Bengal ha Tripura bad kan iai bteng ban iakhun pyrshah tad haduh ba ka sorkar BJP kan shah pynkhyllem na kane ka jylla ka thain shatei lammihngi (northeast), pynbna ki nongialam ka party hynnin ka sngi Nyngkong.
Ka TMC ka la plie ruh ia ka headquarter jong ka party ha kane ka jylla hynnin ka sngi Nyngkong, kata ar bnai shiteng hadien ba kane ka party synshar ka West Bengal ka la pynbna ia ka kyrteng jong ki 132 ngut ki dkhot ba pura jong ka state committee hapoh kane ka jylla ba la synshar da ka BJP.
Hadien ka Assam bad ka Meghalaya, ka Trinamool Congress hapoh ka jingialam jong ka Myntri Rangbah (CM) ka West Bengal ka Mamata Banerjee hynnin ka sngi Nyngkong ka la plie ia ka headquarter jong ka party hapoh ka nongbah Agartala ka Tripura. Hadien kane ka jingplie ia ka headquarter hapoh Chittaranjan Road ha ki bynta pdeng jong ka nongbah, u in-charge ka party TMC ha Tripura u Rajib Banerjee da ka ba shim ia ka jingkren jong u National General Secretary jong ka party u Abhishek Banerjee u la ong : “Ka Tripura ka dei ka thong ka ba bud jong ngi. Ngi dang iai buddien ia kane. Ngin pyntreikam ia ka rukom synshar hapoh Bengal ha kane ka jylla bad bteng ban pynduh pyndam ia ka rukom synshar jong ka BJP.”
“Ia baroh ki skhim ki ba iadei bad ki kam pynroi ia ki ba la pyntreikam da ka sorkar Bengal yn pyntreikam ruh mardor ha Tripura hadien ba ka TMC kan ioh ha ka bor synshar hadien kane ka ilekshon assembly ka ban long ha u snem u ban wan,” ong utei u nongialam ka TMC.
Na ka liang u president ka TMC ha Tripura u Subal Bhowmik u la ong ba ki nongshong shnong ha Tripura ki la iai ap ia kane ka sngi hadien ba ka BJP kan shah pynhiar na ka bor synshar. “Wat hynnin ka miet sngi Nyngkong, ka party synshar ka la pyrshang ban pynthut ha ka ba iadei bad ka jingplie ia kane ka ophis ka party jong ngi. Hynrei ki nongshong shnong ka Tripura ki la don ryngkat bad ngi bad ki kwah ba hapoh ka jingialam jong ka Mamata yn lah ban pyllait ia ka Tripura na ka jingbanbor jong ka sorkar BJP, ong u Bhowmik.
“Ka jingiakhun ka jong ngi ka long ban jop ha kane ka ilekshon assembly ha u 2023, bad ngi don ka jingkyrmen ka ba skhem halor kane ka thong,” u la ong.
Kumjuh na ka liang ka dkhot ka Rajya Sabha ka TMC, ka Sushmita Dev ka la pynpaw ba kumno ka synshar paidbah ha Tripura ka la shah khanglad. Ha ka ri synshar paidbah, ka shim por ia ki party sain hima shi snem ba kin thaw ia la ka jong ka ophis jong ka party ha kawei pat ka jylla. Kane kam shym la dei namar ka jingbym pyrshang ka jong ngi, hynrei namar kiwei pat ki daw.
“Ngi kwah ban pynthikna sha baroh ki nongshong shnong ba ngin ieng ryngkat ha syndah jong ki bad ban ialeh na ka bynta jong ki.Ngin iakhun ia ka ilekshon assembly 2023 ym da ki kuli ne ki jingiaumsnam hynrei lyngba ka lynti jong ka synshar paidbah,”ong ka Dev.
