Shillong, Risaw 12: Ka sorkar jylla hynne ka sngi kala kyntu ia ki nongshong shnong ka jylla ba kin pule iaka ‘Mental Health and Social Care Policy-Meghalaya’ kaba dang shu dep pynbna paidbah bad ba kin ai ruh iaki jingai jingmut ne jingpynsngew halor katei ka Draft Policy.
Ha ka 10 tarik u Risaw 2022 ka sorkar jylla kala pynbna ba kala pynwandur iaka state mental health and social care policy bad katei ka polisi treikam ka thmu ban kyntiew ha baroh ki liang naka bynta kito kiba don iaka jingpang khlieh ne haka bor pyrkhat pyrdaiñ bad ban plie lad ruh iaki ba kin ioh ia ka lad jingsumar.
Ia katei policy la pynwandur hadien ba la pyndep iaka jingwad bniah kaba bun rukom bad kumjuh ruh hadien ba la pynlong iaka jingiatai bad jingiasyllok bad ki kynhun bapher ha ka jylla.
Ki paidbah ki lah ban peit bad pule bniah ia katei ka draft policy da kaba leit ha ka link https://meghealth.gov.in/documents.html bad http://nhmmeghalaya.nic.in/programmes/NMHP/nmhp.html bad kane kan don ha kine ki 15 sngi.
La buh ia katei ka draft policy da ka jingthmu ban ai jingtip ia baroh bad ba kin pyndap ruh ia kino kino ki jingai jingmut ha katei ka policy lada ka don kano kano ka jingduna bad la kyntu ia ki nongshong shnong ba kin ai ki jingsngew ne jingpynpaw ki jongki thik tang ha kaba iadei bad katei ka draft policy.
Ia ki jingpynsngew ne jingai jingmut ha kaba iadei bad ka Draft State Mental Health and Social Care Policy-Meghalaya lah ban aiti da kaba leit ha ka link: https://forms.gle/7cWNjBZpTywnVHus9 bad lah ruh ban phah ia ki jingsngew ne jingai jingmut haka email: [email protected] bad ka tarik kaba khatduh ban phah ia ki jingpynsngew kan long haka 24 tarik u Risaw 2022.
