Shillong, Lber 18 : Ka jinglynshop ki bor ka mariang ba kynthup naduh ka eriong, u phria bad ka jing pom pyrthat naduh ka 13 tarik Lber, kaba ktah ia palat 48,000 ngut ki briew bad pynjulor haduh 13,876 tylli ki Iing ha Jylla.
Kane ka jinglynshop ki bor ka mariang kala jia ha ki 30 tylli ki Block ka Jylla, pyntip ba State Disaster Management Authority ha ka kaiphod bala pynlait ha ka sngi Balang.
Kat kum ka kaiphod bala pynkheh haduh ka 17 tarik Lber, haduh 745 tylli ki Shnong ha baroh ki district ka Jylla kila shah ktah.
Uwei u briew ula iap bad uwei pat ula mynsaw, katba 66 tylli ki jingtei bad 0.4 hectare ki jingthung kila shah pynjulor.
Ym shym la don satia ka jingiap ki mrad lane ka jingjah briew.
