Shillong, K’lyngkot 22 : U Myntri Rangbah ka Jylla Conrad K Sangma, ula pan ia ka jingkyrshan na u Myntri kam Pohiing ka Ri Amit Shah ban ioh pynlong ka Meghalaya ia ka 39th National Games ka ban long ha u snem 2027.
Haba kren sha ki lad pathai khubor ha ka sngi Balang, u Conrad ula ong “Ngi la tyrwa na ka liang jong ngi bad ba ngi kwah ban pynlong ia ka National Games ha u 2027 bad namar kane ka kam, nga la pyrkhat ban iakynduh bad iakren wat ia u Myntri kam pohiing ruh. Ula ai ka jubab kaba sngewtynnad. U don ka jingkwah ba hooid, ka Thain Shatei Lam Mihngi ka dei hok ban ioh pynlong ia ka National Games hadien bun bun snem, kaba khateh eh nga tharai ka dei ha u 2007 lane 2008 ha Assam”.
“ Ngi la pan ia ka jingkyrshan na u ban lah pynurlong ia kane bad ban phah ia ki jingai jingmut ne ka jingkyrshan na ka liang jong u sha ka IOA bad ula kular ha ngi ia ka jingkyrshan kaba pura bad un leh kat kaba lah ban pynlong ia ka National Games hangne ha Jylla Meghalaya” ula bynrap.
U Myntri Rangbah ula pyntip ba ula shong jingialang dang shen bad ka Chairperson ka Indian Olympic Association (IOA) ka PT Usha. “Ha ka jingialang ngi la iakren halor ka National Games ban pynlong da ka Meghalaya ha u 2027. Kala urlong ha Uttarachand mynta bad ka ban wan kan long biang ha u 2027” ula ong.
