Shillong, Naiwieng 02: Ka Shad Nongkrem kaba dei ka shad tynrai jong ki jaidbynriew Khasi kala kut noh hynne ka sngi Nyngkong da ka jingkmen bad ka jingiphiuh ipheng ha ïingsad, kaba don ha Smit.
Ia kane ka shad lehniam la pynlong kum shi bynta ban ainguh ia ka Lei Synshar ban ioh ia ka jingkyrkhu ha ka rep ka riang bad ka bit ka biang jong ki paidbah.
U Syiem ka Khyrim ryngkat bad ki Lyngdoh kila pyndep ia ka lehniam Pomblang, ha kaba la pom ia u blang kum shi bynta jong ka jingainguh ia u Lei Shyllong bad kumjuh ruh ia ki longshwa manshwa na ka Kur kaba ialam ia ka jingsysnhar.
Ka bynta jong kane ka jingshad niam kadei da ka jingiashimbynta ki thei sotti kiba la mih bad la ki riam tynrai ha ka lympung iashad ha kane ka sngi kaba kyrpang.
Nalor kane ki samla shynrang ruh kila ia shad ha ka jaka shad kaba don hakhmat jong ka ïingsad ha kaba kila bat ha kti ia ki waitlam bad u Symphiah, da kaba pynleit jingmut bad shah shkor ruh ia ka jingsawa kaba mih na ki ksing bad ki tangmuri.
Ki paidbah na kylleng ki bynta jong ka jylla kila wan ban sakhi ia kane ka shad bad la sakhi ruh ia ka jingbuh ia ki dukan shabar jong ka iingsad kaba la nang pynshongshit shuh shuh.
Ha ryngkat bad ka riam itynnad ki paidbah kila leit ban sakhi ia kane ka shad kaba shisien shisnem bad kala don ruh ka jingpyninam ia ki jingthain kti bapher bapher bad ia ki jingbam bapher ha kane ka jingrakhe bad jinglehkmen kaba shisien shi snem.
La bun snem kane ka Shad kala khring ia ki nongjngohkai kiba kynthup na kylleng ki bynta jong ka jylla bad wat ia kiba nabar ri ruh.
U Symbud Myntri Rangbah Bah Sniawbhalang Dhar, uba la leit iashimbynta ha ka sngi kut, ula iaroh ia ka jingnang heh jong kane ka lehniam katba nang iaid ki snem.
“Nga sngewkmen shibun ban iohi ba ki paidbah ka Nongkrem bad ki shnong ba marjan kila wan ban lehkmen ha ka Shad Nongkrem. Kane ka lehniam kala nang heh na ka snem sha ka snem bad nga sngewtynnad shisha ban sakhi ia ka. Ka jingtei ha kane ka madan shad ka long shisha kaba itynnad. Nga ai khublei ia u Myntri Rangbah namar ka jingiai kyrshan ia ka Hima” ong u bah Sniawbha.
Ula ong ba ka Sorkar Jylla hi ka long kaba kloi ban ai ia ki jingkyrshan kat kiba wan ban pynpaw ia ki jingdonkam hakhmat jong ka.
“Ka Sorkar jong ngi ka kyrshan ia baroh ki kynhun. La ka dei ka Khristmas ne kano kano ka lehniam, ngi don beit ha ryngkat u paidbah. Ngi kwah ba baroh ki jait niam kin kiew. Ka jingpher ha Meghalaya ka long ba ki khristan ki burom ia ki bym dei ki khristan bad ki bym dei ki khristan ki burom ia ki khristan” ula ong.
U Myntri ka Koit ka Khiah Bah Wailadmiki Shylla, ki MDC bad kiwei ki heh ki hain kila iadonlang ha kane ka lehniam.
