Shillong, Naiwieng 02 : U Symbud Myntri Rangbah Bah Sniawbhalang Dhar ha ka sngi Nyngkong, ula pynthikna ba tang u Bah Paul Lyngdoh un bam smai mynta ka sngi kum u Myntri ha ka Sorkar Meghalaya Democratic Alliance (MDA).
“Ia mynta hi, tang u Bah Paul Lyngdoh” ong u Bah Sniawbha haba kylli halor ka jingpynbam smai ia ki Myntri thymmai.
Hynrei haba iadei bad ka jingpynkylla ia ka bhah kam, ula ong “U Myntri Rangbah u dei u briew ba lah ban iathuh ia phi halor kane namar ka dei ka rai jong u”.
Halor ka jingkylli la ki MLA ka BJP ruh kin ioh shuki lem, ula ong “Ia mynta tang u Bah Paul. Ngin sa iapeit ia kaba hadien”.
U Bah Paul Lyngdoh MLA ka West Shillong bad arngut ki MLA ka UDP-Bah Renikton Lyngdoh Tongkhar bad Bah Nujorki Sungoh, kila iasoh dang shen sha ka National People’s Party, kaba kyntiew ia ka jingdon MLA na ka 33 sha ka 36 ngut.
Ka shuki Myntri ka ban shimti u bah Paul Lyngdoh ka dei kaba lait thylli hadien ka jingiehnohkam u President ka UDP Bah Metbah Lyngdoh hadien ka jingshah ieh marwei kum u MLA ka UDP da ka jingphet seng haduh 11 ngut-8 ngut sha ka BJP bad 3 ngut sha ka NPP.
