Shillong, Naiwieng 02 : U MLA ka West Shillong Bah Paul Lyngdoh ula bam smai biang kum u Myntri Sorkar ha ka sien kaba ar hadien ka jingiasoh sha ka NPP bad ong ba u khlem dawa ia kano kano ka tnad ban khmih hynrei u pdiang ia ka Tnad Tourism halor ka jingkyrpad u Myntri Rangbah.
Ia u Bah Paul la pynbam smai da u Lat ka Jylla CH Vijayashankar ha Raj Bhavan ha ka jingiadonlang u Myntri Rangbah Conrad K Sangma, ki Symbud Myntri Rangbah Bah Prestone Tynsong bad Bah Sniawbhalang Dhar lem bad kiwei ki Myntri.
“Em, nga khlem buh ia kano kano ka jingdawa lane ka jingai jingmut. U Myntri Rangbah ula iathuh ha nga ba u kwah ban iohi ia ka jingbteng jong ki kam bapher bapher ha ka tnad jngohkai, kumta, u kwah ia nga ban shimti ia kane ka tnad ia kaba nga la pdiang sngewbha haba iohi ia ki jingtynjuh kiba la mih ha kine ki sngi bala leit” ong u Bah Paul haba iakren bad ki nongthoh khubor hadien ka jingbam smai hynne ka sngi Nyngkong.
“Ka kamram jong nga ka long ban pynthikna ba ngin pyniaid biang ha ka lynti kaba dei ia ka Tnad jngohkai. Ngi donkam ban pynbeit ia ki jingeh ha ka lynti kaba iahap lang- haba iakren bad ki kynhun bad ha kajuh ka por ban ieng skhem ha ka nongrim” ula bynrap.
U iathuh ba un sa shong bishar ia ki kam ba iadei bad ka tnad Jngohkai ha kine ki khyndiat sngi ban wan.
“Ha kine ki khyndiat sngi ban wan, Ngan sa lum ia ka jingialang ha ki kyrdan bapher bapher kynthup ki Heh Ophisar ka Tnad Tourism. Ka Meghalaya ka don kyrhai ka lad bad ki don ki project ki ban kyntiew ia ka kyrdan jong ka Jylla kum ka jaka wan jnghkai, kumta kan ym don ka jingiapein ia kum kine ki project” ula ong.
Halor ka jingshngain ki nongwankai hadien ki jingjia ba dang shen, ula ong “Ki don katto katne ki lad ki lynti kiba la don ha ka jingmut jingpyrkhat jong nga bad khlem pep ngin sa nang pynkhlain ia ka lad iada bad ka jingsngain ym tang ki nongwankai hynrei ki nongshongshnong ruh kumjuh. Ka plan kala thut tad haduh u snem bala leit hadien ba don ka jingkylla ba kynsan ha u nongkhmih. Mynta ngan sa bishar thymmai hangno ka kam kala poi hadien ba la iaid palat shisnem”.
Haba kylli la un ioh lang ia ka tnad Social Welfare ruh, ula ong “Nga khlem pat ioh ktien eiei ruh em, hynrei lashai ka sngi phin sa lah ban tip”.
Halor ki khubor ba ia u Bah Metbah Lyngdoh la pynbor ban iehnohkam khnang ban plie lynti ia u, u Bah Paul ula ong “Kine ki dei ki kam kiba ngam bna eiei ruh em namar kaei kaba jia ka dei hapoh ka CM Secretariat bad CM Bungalow. Ngam lah ban ioh ia kum kine ki jingtip. Hynrei kaei kaba nga lah ban iathuh ia phi ka long ba nga la pyrshang kat kaba lah ym tang ban don ha Ophis hynrei ha ka bor ban pynthikna ba ka bor ba ngi treikam kan ai jingmyntoi ia ka Jylla”.
