Shillong, Naiwieng 02: Ha ka sien kaba nyngkong eh, yn pynlong ia ka European Union Film Festival (EUFF) kaba 31, ha Shillong kaban sdang naduh ka 12 tarik haduh ka 18 tarik u Naiwieng, ha kaban yn wanrah lang ia ki 21 tylli ki phlim kiba la jop ia ki khusnam na ki dkhot jong ka European Union sha ki nongpeitkai jong ka jylla Meghalaya.
Ia kane yn pynlong da ka kynhun jong ka European Union sha India ryngkat ka jingiatreilang bad ka EU Member States, kane ka tamasa kan pyni ia ki phlim na ka dewbah Europe kiba iadei bad ki bynta jong ka jinglongtynrai, kaba iadei bad ka jinglong kynthei bad shynrang, ki longiing longsem, ki kabu, ki jingiadei parabriew bad ki jingkylla ha ka imlang sahlang.
Kane ka tamasa kaban long ha Shillong kadei ruh kaba la pynlong ryngkat ka jingiatreilang bad ka Asian Confluence Centre. Ka jingpyni ia ki phlim kan long ha ki 4 tylli ki jaka kaba kynthup ia ka Asian Confluence Centre (The Habitat), Lady Keane College, St. Edmund’s College bad KL Bajoria College.
Ki phlim kiba la pynmih da ki nongpynmih phlim ba pawnam ka Europe ki kynthup ia ka Sandra Hüller-Starrer Rose na Austria, Oliver Laxe’s jong ka phlim na Spain Sirāt, ka drama na ri France ‘The Richest Woman in the World’ bad na Italy kaba la tip kum ka ‘A Year of School’.
Kiwei pat ki phlim ki kynthup ia ka Bring Me Home (Bulgaria), Drazen (Croatia), Maricel (Cyprus), The Last Viking (Denmark), Stormskerry Maja (Finland), DODO (Greece), 22 Lengths (Germany), Mommy Blue (Hungary), Wolfwalkers (Ireland), Maria’s Silence (Latvia), Sand in Your Hair (Lithuania), A Boat in the Garden (Luxembourg), Jippie No More (Netherlands), No Ghosts on Good Street (Poland), Projecto Global (Portugal), Path to the Impossible (Slovakia) bad ka Hidden People (Slovenia).
U Jean-Eric Paquet, Ambassador jong ka European Union sha India, ula ong, ba ka Shillong kadei ka jaka kaba biang bha ban sdang ia kane ka tamasa phlim namar ba ka don ia ki kolshor kiba iar bad ka jingiaroh ia ka jingiathuh ia ki khana.
Ula ong ba ka tamsa ka tyrwa sha ki paitbah ia ki kabu ban shemphang shaphang ka Europe lyngba ki kam jong ki nongshna phlim bad ban ioh ia ka jingsngewthuh kaba iar halor ki khana kiba bunjait shaphang ki briew.
La khmih lynti ia u Paquet ban wanpoi ha Shillong ha ka 13 tarik u Naiwieng ban iashimbynta ha kane ka jingpyni paitbah ia ki phlim.
U Artur Zaborski, u nongpynwandur ia kane ka tmasa, ula ong ba ka jingjied ban wanrah ia ki sur bad ki khana ha ki kolshor bapher, ka ktien ka thylliej bad kiwei kiwei ki bynta. Ki phlim kin pyni ia ki sobjek kiba bun naduh na ka kam saiñ pyrthei, ka imlang sahlang, ki longiing longsem, jingieid bad ka jinglong trai.
Sabyasachi Dutta, Executive Director ka Asian Confluence Centre, ula ong ba ka jingpynlong ia kane ka tamasa kan thaw ia ki kabu na ka bynta ka jingkren halor ki kolshor bad ban pynkhlain ia ka jingiadei hapdeng ka dewbah Europe bad ka thain shatei lammihngi jong ka ri India.
Ha kane ka kynti kaba mynta, yn sdang ruh ia ka EUFF Film Project, ka sienjam ban ai rynsan ia ki samla bad ia ki nongshna phlim jong ka ri India. Lyngba kane ka projek la khot pyni ia ki phlim lyngkot kiba 5 haduh 10 minit halor ki mat ki bapher bapher kynthup ia ka jinglong tynrai, ka jingphet shnong, ki jingkynamw kiba iadei bad ka kolshor, ka jingshem jong ki kynthei, ki khana kiba phylla, ka jingkylla ka mariang bad ki jaidbynriew riewlum.
Ia ki 10 tylli ki phlim kiba pawnam ka ri India yn pyni paitbah ha kane ka tamasa kaban long ha Delhi.
Hadien ka Shillong, yn pynlong ia kane ka tamasa ha New Delhi naduh ka 25 tarik u Naiwieng haduh ka 4 tarik u Nohprah bad yn leit pynlong ruh sa ha Pune ha u Nohprah.
Ka jingpyni ia kine ki phlim baroh ha Shillong kan dei kaba pyni ei bad ki paitbah ki lah ban leit peitkai katkum ka jinglah ban poi kloi (first-come, first-served) bad ka long ruh kaba donkam pat ban rejistar ialade.
