Shillong, K’lyngkot 22 : Ka Sorkar Pdeng kala bthah ia ka Sorkar Jylla ba kan pynphai noh ia ka pisa ba palat T.200 klur lada kam lah ban pynbeit noh kham kloi ia ka kam thied jaka na ka bynta ban pyntrei ia ka project lynti rel ha Ri-lum Khasi.
Haba pyntip ia kane ha ka sngi Balang, u Myntri Rangbah Conrad K Sangma ula ong “Nga la iakynduh ia u Myntri ka tnad Railway bad ula pynpaw ia ka jingsngewkhia halor ka project lynti rel ha Byrnihat bad ruh ha Shillong. Nga la dep ban kren shai bha ha u ha ka jingialang bad ngi donkam ban shim lang ia ka jingmynjur ki kynhun bapher bapher bad khlem da leh ia kane, kam long kaba iahap ia ngi ban leh da ka bor ia kane ka kam. Nga la ban jur ban shim lang ia ka jingmynjur jong baroh shuwa ban shim ia ka rai kaba heh kum kane”.
Lah ban kdew ba ka Sorkar Pdeng kala tyrwa ia artylli ki project lynti rel ha Jylla-ka Tetelia-Byrnihat ba 22 km bad ka Byrnihat-Shillong ba 108 Km.
Ia ka project Tetelia-Byrnihat la mang ban pyntrei ha ka jingmang pisa ba T.496 klur. Hynrei, kine ki project kila iatakhuh ia u diengpyngkiang namar ka jingpyrshah na ki kynhun bapher bapher kiba sngewkhia ia ka jingwan rung kyrthep ki bar jylla.
U Conrad ula pyntip “U Myntri ula pynpaw…un sa thoh shen ia ka shithi sha nga ba lada ym lah ban pynbeit noh ia kane ka kam hapoh 3 lane 6 bnai, ka pisa ba T.200 klur bala ai ban thied jaka bad kaba la don bad u DC naduh u nem 2017, ngin hap ban pynphai noh. Ngin hap ban pynphai noh bad kaba kham kongsan ka long ba ia kane ka project yn sa pynduh noh bad ka Sorkar kala pyntrei noh ia kiwei ki project lada kiwei ki Jylla ka thain ki kwah”.
“Nga la kyrpad ia u (Myntri) ban ai poria ngi ban gin iakren hynrei ka jingaipor ka long kaba khim bha. Ym shym la kren thikna ia ki bnai hynrei ula ong ba tang ha ki khyndiat bnai bad un sa thoh sha nga shen bad lada donkam, ma u hi dalade un wan bad shong jingialang bad ki kynhun bapher bapher ban iakren ia ka jingkongsan jong kane ka kam bad ngin sa iapeit kumno ka kam ka iaid” ula ong.
