Shillong, Nailar 11 : Ka Iingkashari Meghalaya High Court hynne ka sngi palei, kala bthah ia u Justice (Retd) BP Katakey ban ai jingkhein ia ka jingdon jong u dewiong bala dep tih lypa, uba dei ban lilam hapoh ka Jylla.
U Justice Katakey u dei uba la thung da ka Iingkashari ban ai jingmut halor ki sienjam ba hap ban shim da ka Sorkar Jylla kum ka jingpyntreikam ia ka hukum jong ka Iingkashari Supreme Court bad ka National Green Tribunalo (NGT), kynthup ka jingdie lilam ia u dewiong bala dep ban tih lypa.
Ha ka hukum, ka Iingkashari ba pura kaba la khlieh da u Chief Justice Sanjib Banerjee kala ong ba dei ban shim noh mardor ia ka sienjam ha kaban lilam noh ia u dewiong uba sah namar ka jingmih ki jingkynnoh na ki kynhun bapher bapher baka jingtih tuh ia u dewiong ka dang bteng hapoh ka Jylla.
“Ia mynta, u Justice Katakey u dei ban pyni ia ka jingdon jong u dewiong u bym pat dep lilam bad ka Sorkar Jylla ka dei ban ai ia ka jingkyrshan baroh ha kaban pynthikna ia ka jingioh jingkhein ba thikna” ong ka Iingkashari haba shong bishar ia ka PIL halor kane ka kam.
Ka Iingkashari kala ong ruh “Shisien ba la ioh ia ka jingkhein ba thikna, kan sa weng noh ia ka jingartatien ba ka dang don ka jingtih dewiong bad ka jingkhaii ka iaid da u dewiong ba dang shu dep tih thymmai ia uba la pynman kum u dewiong bala tih shuwa ka jingkhang pyrshah kat kum ka hukum bala pynmih ha lane shuwa u 2017”.
Ka Iingkashari kala bthah ruh ia ka Sorkar Jylla ban siew noh ia ka bainong ba dang pynsah jong u Justice Katakey kaba long T.1.5 lak.
U Justice Katakey ula file ia ka interim report kaba lai ha ka 9 tarik u Nailar. Ka Iingkashari ka ong ba kan ailad ia ki kynhun manla jong ka mukotduma ban shim ia ka copy jong ka kaiphod na u Ophisar jong ka Iingkashari.
Ka Iingkashari kala buh ban shong bishar biang ia kane ka mukotduma ha ka 25 tarik u Nailar.
