Nongpoh, Nailar 11: Ka shnong Umlakhar, Ri-Bhoi District kala hap ban shongdum mynta la saw bnai kynthih namar ka jingkynnoh khein sting jong ka Tnad MeECL ban bujli ia u Transformer uba la duh hapoh ka Shnong.
“Mynta la saw bnai kynthih ngi ki nongshongshnong ka Umlakhar ngi hap ban shu shong dum khlem bording namar ka jingduh jong u Transformer ha Shnong” ong u Bah Royes Madur, Rangbah Shnong ka Umlakhar.
Une u Nongialam Shnong ula pynpaw ia ka jingsngewkhia kaba jur ba ka Tnad MeECL kam shym la pynsngap ia ka jingud jingnam jong ki paidbah kiba la hap ban shu shong kum ha ri khlaw ha kine ki saw bnai.
Kat kum ka jingong jong u, ka Bor Shnong kala dep ban pyntip ia kane ka jingduh u Transformer sha ka MeECL hynrei la kynnoh ba kane ka Tnad kala leh bym patiaw. U ong ba kane ka jingleh kane ka Tnad Sorkar kala wanrah ia shibun ki jingeh ia ki nongshongshnong khamtam ki samla pule bad ki Khynnah Skul.
“Baroh ki kam ki jam ruh kila dkoh lut na ka jingbym don ka bording eletrik” ula ong haba kyntu ia ka MeECL ba kan sngap lem ia ka jingeh ki paidbah da kaba wan bujli noh da u transformer ba thymmai ha kane ka shnong.
