Shillong, Jymmang 12: Ki pulit ka East Jaiñtia Hills ki kyntu ïa ki paidbah ban wan shakhmat ban ai jingtip khnang ban lah pynithuh ia kawei ka metïap shynrang ba lap na ka krem dewïong ha ka shnong Mulait Bri-Sumer ha ka taiew ba la dep.
U Superintendent of Police u Pankaj Rasgonia, u la iathuh ba katei ka met iap ka la kem pyut bad la buh ia ka ha jaka buh metiap ha Civil Hospital Khliehriat na ka bynta ban wan kam daki bahaiing hasem.
“La kyrpad ïa ki paidbah ba kin wan shakhmat ban ai kino kino ki jingtip lada ki don kano kano ka jingtip shaphang kane ka metiap, lane shaphang kiba haïing hasem jong u,” ong u Rasgonia.
Iaka metiap la iohi baka per ha kawei ka par dewiong ha ka 9 tarik Jymmang.
“Ha ka 09-05-2026, ha ka por kumba 01:50 janmiet, la ïoh jingtip lyngba ka telephone na u Rangbah Shnong ka shnong Mulait Bri-Sumer ba la ïohi ïa kawei ka metïap shynrang bym lah ban ithuh baka per hapoh ka krem dewïong ha Mulait Bri-Sumer,” ong u SP.
Ka kynhun pulit na Mooriap BOP ki la leit mar mar sha katei ka jaka bad ki la lap ia ka met iap kaba per haka kdew dewiong kaba jylliew kumba 50 phut. Da ka jingiarap jong ka kynhun SDRF, la lah ban sei ia katei ka metiap na katei ka par dewiong.
“Hadien ba la dep ban bud ryntih ïa baroh ki kyndon aiñ, la kit noh ïa ka metïap sha Civil Hospital, Khliehriat ban pynthikna pynlong ka jingtohkit ban lap ïa ka daw ba shisha jong ka jingïap,” ong u Rasgonia.
Ki pulit ki la iathuh ba utei u briew um pat lah ban ithuh namar bala pyut palat ka met. La kyntu ia kino kino kiba don jingtip shaphang une u rangbah ne shaphang kiba ha iing ha sem jong u ba kin sngewbha ban iakynduh ia ki pulit jong ka East Jaintia Hills.
Ka jingtohkit halor kane ka jingjia ka dang ïaid shakhmat.
