Shillong, Jymmang 12: U Myntri Rangbah ka Meghalaya Conrad K. Sangma, ha ka sngi Ba-ar u la lum ia ka jingialang ban bishar kam halor ka plan kam pynroi ba thymmai ba kot T.1,928-klur na ka bynta ka sor Tura, haba buh jingmut ban pynsted ïa ki jingtei kiba kongsan ba kynthup ha ka kam jngohkai, kam ïalehkai, bad ki project pynthymmai sor kiba thmu ban pynkylla dur ïa ka sor Tura.
Ia kane ka jingialang la pynlong ha Tura ha ka jingiadonlang ki Myntri Sorkar Timothy D Shira bad Bah Sanbor Shullai.
Ka jingialang kala shong bishar ia ka jingiaid ki project ba dang don hapdeng ka jingpyntrei bad iakren ruh ia ki jingthmu na ka bynta ki kam ban wan, ki ban sa pyntrei ha ki bynta bynta.
K ki project kiba dang iaid ha ka jingkynshew pisa baroh lang ba kot T.1331 klur ki dei kiba la shong bishar ha kane ka jing ialang.
Kine ki kynthup ia ka Tura Integrated Administrative Complex (T.165 klur), bala khmih lynti ban pyndep da ki bynta bynta kaban sdang naduh u bnai Nailur 2027, ka PA Sangma Sports Complex bad ka West Stand, ka Pa Togan Sangma Track & Field Stadium bad ka Tura Technology Park.
Kiwei pat ki project kiba dang iaid ki dei ka project ban pynitynnad ia ka Tura Bazaar, ka jingtei ia ka Convention Centre, Pelga Tourist Circuit & Hospitality Complex, Working Women’s Hostel, ka jingshna ia ka Heliport, bad ka Tura Water Supply Scheme.
Ka jingpyntrei thymmai ia ka Polo Orchid Hotel la khmih lynti ba kan sa sdang noh shen.
Ki project ba shongdor T.242.74 klur kiba la pynkhreh ban khot tender ruh ki dei kiba la iashong bishar ka. Ia kine yn sa pyntrei da ki bynta bynta bad ki kynthup ia ka jingpyntrei thymmai ia ka Najing Bazaar, ka Multi-level Parking bad Cinema Complex ha SMELC, Tura City Park, ka Active Ageing Centre, ka Kid Zone ha Araimile bad ka Tura Promenade.
Kiwei ki project kiba thmu ban pyntrei ki kynthup ia ka Chief Minister’s Youth Centre, ka jingshna pynbha ia ka Circuit House, ka Commercial Complex, ka jingpyndait ia ki street light, ka jingpynroi ia ki jaka ialehkai ha Kendriya Vidyalaya.
Ki project kiba dang don ha ka jingpyrkhat, kiba la mang T.155 klur, ki kynthup ïa ki ïingsah kiba jem dor, ka archery complex, bad kiwei pat ki jingtei kiba iadei bad ka kam khaii pateng.
Ka jingkynshew kyllum kaba thmu na ka bynta ka jingpyntrei thymmai iaka Tura ka long kumba T.1928 klur.
U Myntri Rangbah ula ban jur ia ka jingdonkam ban pyndep hapoh ka por kaba biang ia ki project bad ka jingiatreilang ba kham bha hapdeng ki Tnad Sorkar.
