Agartala, Naiwieng 20 :U Chairman kaTIPRA Motha u Pradyot Kishore Manikya Debbarma ula kam ba ka liang pyrshah CPI(M) bad Congress mynta kila pan ia ka jingiarap lem ka jong u na ka bynta kane ka ilekshon assembly ka ban wan.
U Pradyot uba dei ruh u khun syiem ka jylla ula ong ba un iehnoh ia ka kam chairman jong ka TIPRA Motha lada ka sorkar kan mynjur ban pynioh ia u ia ka ‘Greater Tipraland’.
Haba iashim bynta ha ka jingialang paidbah jong ka Youth Tipra Federation (YTF) ha Mandwai hapoh West District, u Pradyot ula ong ba wat hadien 75 snem jong ka jingioh laitluid, hynrei ki trai shnong riewlum kila mad ia ka jingeh ha ka liang ki kam ki jam, ki jaka puta nalor kiwei pat.
“Balei kine ki wan jia? Namar ki katto katne ki nongialam ki jong ngi.Ha Assam, Nagaland, Mizoram bad kiwei pat ki jylla ka thain shatei lammihngi (Northeast) ki nongshong shnong ki iakhun halor ki hok ki jong ngi bad ioh ia ka jingjop.Hynrei, ha Tripura, ngi ki Tiprasa ngim shym ia khun hynrei ngi la shu ia pynbeit bad iasuk.Ka bor kaba phi don bad ka jinglong nongialam kan ym lah ban pynioh ia phi ia ka Tipraland. Nga long uba la kloi ban iehnoh ia ka kam kum u chairman ka TIPRA Motha lada ka sorkar kan pynioh ia ka ‘greater Tipraland’ namar ka bor bad ka kyrdan ki long tang shipor,” kam u Pradyot.
Ha ka jingkren kaba thew ia ka BJP, u Pradyot ula ong, “Ym ki Mughal, lane ki British kiba lah ban pynpynrem ia ka jingsynshar syiem jong ka Manikya Dynasty, kumta ruh kumno ka BJP kan lah ban leh ia kata.Ailad ba kin ia aireng Nga long uba kloi.Ki nang tharai ba kin ai ia nga bad Ngan pyndem ha ki.Kila klet ia ka snam ka jong nga na ka longiing syiem jong ka Manikya Dynasty.Ki kwah ban ia aireng pyrshah ia nga? Ailad ba kin ia aireng, U khla u dang im haduh mynta.”
Da kaba kynthoh tyngeh ia ka CPI(M) bad Congress une u khun syiem ka Tripura ula ong, “Kaei kaba ki trai shnong riewlum ka Tripura kila ioh na ka CPI(M)? Uwei na ki Myntri Rangbah (CM) ka CPI(M) ula ialap ia lade ba u dei u CM uba duk bad um don ruh wat ka iing la jong.Um shym la lah ban pynioh wat tang kawei ruh ka iing ia ki trai shnong.Une u CPI(M) ula kren ha kaba iadei bad ka China. Hynrei mynta ki kwah ia ka jingiarap ka jong ngi, ha kaba kila iakren bad iakynduh ruh ia ngi.Kila iehnoh ia ki trai shnong.Haba Nga dang don ha ka Congress Nga la rai ia ka mat na ka bynta ki trai shnong ki jong ngi, hynrei ka jingpynphai ka long ban kren bein ia nga bad pynbor ia nga ba ngan iehnoh kam.Hynrei, mynta ki kwah ia ka jingiarap ka jong nga namar Nga trei na ka bynta ki paidbah ym na ka bynta ki kam politik.
