Nongstoiñ, Ïaïong 07: Ka jingkieng Phod Thre ka dei ka jingkieng kaba pynïasoh ïa ka Upper New Nongstoiñ bad ka shnong Tiehsaw, ïa kaba la sdang ban shna naduh u snem 2003 ha ka por ba ka Balang Presbyterian New Nongstoiñ ka pdiang ïa ka jingïaseng jong ka Khasi Jaiñtia Presbyterian Assembly, hynrei u kontraktor u ba pyntrei ïa katei ka jingkieng um shym la pyndep satia.
Ki riew rangbah ka shnong kiba la kynjoh sanphew snem sha jrong, ki la thaw da ka kynhun kaba la tip kum ka West Khasi Hills Senior Citizen Association, kaba la sdang ïa ka jingtreilam da kaba pynkynmaw sha ka sorkar ba kan pyndep noh ban pyntrei ïa baroh ki projek kiba dang shateng hapoh Nongstoiñ ban kiwei kiwei khnang ba kan long ka jingmyntoi ïa ki paitbah.
U babu P.K.Lynser uwei na ki nongkitkam ba hakhmat jong katei ka synjuk, haba ïakren bad u nongthoh khubor u la ong ba hadien ka WKHSCA ka la sdang ïa ka jingtreikam, ka la pynkynmaw sha ka sorkar ba kan pyndep noh ban shna ïa katei ka jingkieng. Ka sorkar ka la shah shkor bad mynta u snem ka la dep ban mang pisa haduh san klur tam na ka bynta ban shna pyndep ïa katei ka jingkieng.
Utei u rangbah u la ong ruh ba lada ïa katei ka jingkieng la lah ban shna pyndep kan pynsuk shibun ïa ki paitbah ha ka leit ka wan bad ka jingdheng kali ruh kan duna bha ha sor Nongstoiñ.
U la ong ruh ba ki dang don shibun kiwei pat ki projek kiba ka sorkar ka la dep ban sdang, hynrei ki dang sahkut haduh mynta. Kumta na ka liang ka synjuk ka kyrpad jur ïa ka sorkar ba kan ïaleh katba lah ban pyndep noh ïa baroh ki kam kiba dang sahteng.
