Nongstoiñ, Nailur 10: Ka Public Works Deparment (PWD) ka Jylla kala shu ieh khongreng bad khlem lah trei pyndep ia kawei ka jingkieng ha sor Nongstoin mynta la palat 20 snem, kaba la shah pynrem bad shah kynthoh lai phew jait ha ki Nongshongshnong ka thain.
Kane ka jingkieng ka dei kaba don ha Wah Phodthre-kaba pyniasoh ia ka surok Irrigation sha Mawrusyiar-Tiehsaw.
Kane ka jingkieng kaba jrong kumba 18.75 metar, la sdang ban shna naduh u snem 2001 shuwa ban don ka jing iaseng KJP Assembly jong ka Balang Presbyterian ha u snem 2002, kaba long ha New Nongstoin. Ka Tnad PWD kala dep ban pynieng ia uwei paia hashiliang sha ka wah hynrei kala sangeh noh bad khlem pyndep shuh.
Ka jingbym lah ban pyndep shuh ïa kane ka jingkieng, ka la wanrah ïa u dak jingkylli u ba heh bha na kiba bun ba lang ba hato kaei ka daw ba ka tnad PWD kam lah ban pyndep ïa kane ka jingkieng, kaba la thmu ban shna na ka bynta ka bit ka biang ki paidbah.
Ha ka jingshisha kane ka dei ka jingkieng kaba donkam haduh katta katta na ka bynta ki paidbah ka sor Nongstoiñ, namar ka dei kaba pynïasoh ïa ka shnong Upper New Nongstoiñ bad ka shnong Tiehsaw.
Ka jingdonkam ka long khamtam eh lada don ka jingdheng kali ha Assam oil Petrol Pump shaduh Upper New Nongstoiñ ter ter, lane lada don ka jingdheng kali nadong Spengthawlangmlah sha New Nongstoiñ, kane ka jingkieng kan ïarap ban pyllait na ka jingsahkut ki kali. Nangta kan ïarap ruh ïa ki khynnah skul kiba dei ïaid lyngba kane ka wah ban kam na shilliang sha shilliang.
Ha kaba ïa dei bad kane ka bynta, u nongthoh khubor haba ïa kren bad u Rangbah Shnong ka shnong Tiehsaw Bah Moonshine Dkhar, uba la iathuh ba dang ha u snem 2018 u MLA ka Nongstoiñ Bah Mac Millan Byrsat, ha ryngkat u Superintending Engineer bad Executive Engineer jong ka tnad PWD, ki la poi sha ka shnong Tiehsaw na ka bynta ka jingpynbha ia ki surok jong ka sor Nongstoiñ.
U la ïathuh ba na ka liang ki bor shnong ruh ki la sakhi lang ruh ia ka jingkyntu u MLA ïa ki heh jong ka tnad PWD ban buddien ïa ka kam kaba ïa dei bad katei ka jingkieng kaba la shu sahkut khlem lah pyndep shuh da ki phew snem.
Hynrei, ka shu long ka jinglyngngoh sha ki paidbah jong ka thaiñ Nongstoiñ, ba haduh mynta ym pat iohi dak ei ei ba la sdang ban trei pyndep ia ka jingkieng.
Namar kane, ki paidbah jong ka sor Nongstoiñ, ki kyntu ia ka tnad ba kan sngewbha ban pynsted katba lah ïa ki jingdonkam baroh, namar katei ka jingkieng ka long kaba donkam haduh katta katta na ka bynta ka sor Nongstoiñ baroh kawei.
